11 oktâbr çarşembe sabası Bağçasarayda, bir qaç qırımtatarnıñ evinde tintüvler keçirile.
Facebookta tintüvler keçirilgen evlerniñ adresleri bildirile: Çepurina soqağı 9 (Suleyman Asanov, «Salaçıq» kafesiniñ saibi), Mira soqağı 20, 60 kvartira – Seyran Saliyevde, onda tintüv endi üçünci keresi keçe, Mira soqağı 14 – Timur İbragimovnıñ evinde ve Gordiyenko 16 adresi boyunca Server Zekeryayevniñ evinde.
«Krımskaya solidarnost» birleşüviniñ koordinatorı Dilâver Memetovnıñ Facebookta bildirgenine köre, Marlen Musrafayevnıñ evi yanında Elnur Asanovnı (Marlenniñ ağası), Refat Asanovnı (Marlenniñ babası, 62 yaşında), Ernest İbragimovnı, Eldar Asanovnı ve Rudem Neciyevni belli olmağan tarafqa «alıp kettiler».
Bağçasarayda, tintüvler keçirilgen yerden, eñ azında 8 insannı tutuqladılar.
«Tintüvler vaqtında qol tutmağa kelgen adamlarnı da yaqaladılar. Marlen Asanovnıñ evi yanında beş adamnı, Seyran Saliyevniñ evi yanında ise, üç adamnı. Olarnı yerli polis hızmetine alıp ketecek ediler», — dep bildirdi Memetov.
Qırımdaki FSBniñ matbuat hızmetinde haber etkenlerine köre, Baüçasarayda Rusiyede yasaqlanğan «Hizb-ut-Tahrir al — İslâmi» halqara terroristik teşkilâtınıñ faaliyeti kesildi.
Qırım ve Aqyar boyunca çalışqan FSBniñ taqiqat bölügi, altı adamğa qarşı, qanunğa qarşı yapılğan faaliyet boyunca cinayi iş açıldı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
Foto: Remzi Bekirov
