Aqmescitteki ressamlar Evinde ressam ve eykeltıraş Ayder Aliyevniñ ve foto ressam Evelina Aliyevanıñ acayip sergileri açıldı.
Sergideki merkeziy obyekt belli maarifçi ve publitsist İsmail Gasprinskiyge bağışlanğan edi. Maarifçiniñ ğayeleri insanlar içün pek tesirli olıp, bugünki künde de aktual qalmaqtalar. Ayder Aliyev Gasprinskiyde öz aksini tapa. Ressam, Gasprinskiy kibi, dünyağa başqa nazarnen baqa. Sergide taqdim etilgen instalȃtsiya – eykeltıraşnıñ «Terciman» gazetasına olğan nazarıdır.
«Bu bir teatrdir, yani mında bütün qırımtatar halqınıñ tarihi aks olunğandır. Bu balaban bir iştir, mında tehnik işten ğayrı, balaban ruhiy küçte kerektir. Bu taraftan Ayder, elbette aqiqiy ressamdır», — dey ressam Ramazan Useinov.
Sergide daa, eykeltıraşnıñ bitası, nağışçı Hatice Buboñ da işleri taqdim etilgen edi.
Onıñ qızınıñ da işleri ek tesirlidir. Evelina aytqanına köre, o fotoapparatsız evden çıqmay. Fotolar – onıñ ömüridir. Balalığından fotoğa aveslik köstergen Evelina, fotosüretlernen professional şekilde beş yıl evelsi oğraşıp başladı.Onıñ işleriniñ merkeziy odeli – onıñ qızıdır. Evelinanıñ fotoları mücizeviy oladır.
Evelinanıñ işleri bir çoq foto sergilerde kösterilgendir. Onıñ eñ sonki yeñişlerinden biri, bu fotoişleriniñ belli Photovogue leyhasında iştirak etmesidir. Bu VOGUE İtaliya mecmuasınıñ internet – platformasıdır. Mında bütün dünyadan saylanğan eñ güzel foto resimler basıladır. Eki yıl içinde Photovogueda qırımtatar icatkârınıñ 15 işi taqdim eteildi. Bir fotosi ise, «The best of Photovogue» (Photovogueda eñ yahşısı) nominatsiyasına kirdi. Bu, onıñbalalığı keçken bita – qartbabasınıñ Kökközdeki eviniñ fotosı.
Aliyevlerniñ ayleviy sergisi, Qırım ressamlar birliginiñ sergiler zalında, K. Marks soqağı 13/ 16, 30 oktȃbrge qadar devam etecektir.
Foto: Lenyara Abbullayeva
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
