Qırımda maküm etilgen qırımtatar milliy areketiniñ faalleri Ahtem Çiygoz ve İlmi Umerov Türkiyege teslim etildiler.
Bu aqta Ukrainanıñ malümat siyaseti naziriniñ birinci muavini Emine Ceppar haber etti.
Ondan evel bu haberni, Ukraina deputatı, belli uquqqoruycı ve qırımtatar milliy areketiniñ lideri Mustafa Cemilev bildirgen edi.
«Bu iş siyasiy mabüslerniñ ayatlarına lâqayid qalmağan insanlar olğanı, qırımtatarlarğa qol tutqan adamlar barlığı içün olıp çıqtı. Elbette, balaban yüridik, diplomatik, siyasiy areketler ile, Mustafa Cemilev ve Recep Tayip Erdoğannıñ küçleri ile bu işni becere bildik», — dep Nikolay Pılozovnıñ sözlerini bildire «QırımAqiqat».
Onıñ haber etkenine köre, Çiygoz ve Umerovdan bütün qabaatlar alındı.
«Ahtem Çiygozde, İlmiy Umerovda mefa aqqında arizalar yazmağan ediler. Olar qırımtatar halqınıñ qaramanları, Ukrain siyasiy mabüslarıdır, olar içün vicdan ve ahlâq printsipleri kendi azatlıqlarından daa üstündir», — dedi advokat.
Resmiy olmağan malümatlarğa köre, Ahtem Çiygoz ve İlmi Umerovnıñ Türkiyege berilmeleri aqqında añlaşmaları, Recep Tayip Erdoğannıñ ve Vladimir Putinniñ soñki körüşmeleri vaqtında olıp keçkendir.
Saat 13.30 Ahtem Çiygoz ve İlmi Umerovnı «Aqmescit — Anapa» uçağına oturttılar, Anapağa yetken soñ uçaq Ankarağa yol alacaq. Qırımtatar milliy areketiniñ liderleri Ankarağa 25 oktâbr künü kelip yetmek kerekler. Birazdan olar Kiyevge kele bileler.
Avdet haber etkeni kibi, Qırım Cumhuriyetiniñ Yuqarı mahkemesi Ahtem Çiygoznı, «2014 senesiniñ 26 fevral künü kütleviy qarışmalar teşkil etkeni» qabaatınen 8 yıl apis cezasını berdi.
27 sentâbr künü Aqmescit rayon mahkemesi, İlmi Umerovğa eki yıl müstemleke — yaşaması cezasını berip, Kütleviy haber vastalarında ve cemaatçılıq içinde çıqışlar yapmağa yasaq etken edi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
