Yarın, 28 oktȃbr künü, Bağçasarayda saat 13.00 , bu yıl avgust ayında Tver vilȃyetinde tapılğan ofitser Bekir Umerovnıñ cesed qalıntıları, tantanalı şekilde defn etilecek.
Qırımtatar faali İbraim Voyennınıñ haber etkenine köre, defn merasimi, Han saraynıñ cenübiy tarafında yerleşken, cenk devamında ve hastahanelerde yaralardan vefat etken arbiylerniñ kömülgen Qardaşlıq mezarlığında olıp keçecek.
Bu merasimde cumhuriyet ve şeer akimiyeti, soy – soplar ve cesed qalıntıları taplğan Tver vilȃyetiniñ Belıy şeerinden delegatsiya bulunacaq.
Uyken leytenant Bekir Ametoviç Umerov 1918 senesi Bağçasarayda dünyağa keldi. Vefat etken, dep 1942 senesiniñ 13 dekabrinden belli.
Araştıracılar cesed qalıntılarını ormanda, bataqlıq yanında taptılar. Yanında şişe içinde bulunğan tezkereni taptılar. Tezkere, demir ve ebanit savutında degil de, cam şişe içinde bulnğanı içün pek yahşı saqlanıp qalğan.
Tezkerede: «artelerist qaraman bizim komisar Umerov cenkte vefat etti», — degen yazı bar. Bu sözlerden çoq şey añlamağa mümkün. 1942 senesiniñ oktȃbr ayında, Qırmızı Orduda komisar unvanı alınğan edi. Amma Bekir Umerovge böyle muracaat etkenlerine köre, onı ürmet etekenlerini bilmege mümkün.
«Onıñ içün onı biraz ayrı defn etkenler, onıñ içün tezkerene şişe qaldırğanlar, onıñ içün «bizim komisar», dep yazğanlar, addy komisar degilde, artelerist qaraman olğanını bildirgenler», — dey «Kurgan» araştrma otrȃdnıñ komandanı Andrey Çekanov.
Ğalebe bağçasından delegatsiyanı Qırımğa ozğardılar. Leytenantnıñ ciyeni tapıldı.
«Qırımtatar halqı Qırımdan sürgün etilgen edi. Ciyanında foto süret saqlanıp qalğanı mücizedir. Sürgünlik zamanında, er kez kerekli şeylerni almağa tırışa edi, olarnıñ sırasında foto süretler bardır», — dey «Kurgan» araştırmacılar otrȃdnıñ azası Andrey Solovets.
Avdet haber etkeni kibi, Tver vilȃyetiniñ Belıy şeerinde, 11 avgust künü, «Kurgan» araştırmacılar tarafından arbiyniñ cesedi tapıldı.
Arhiv vesiqalarına köre, 1918 senesi doğğan üyken leytenant Umerov Bekir Ametoviç, Bağçasaray şeerinde doğdı. Sonki vazifesini keçirgen yer: 41-nci artelerist ordusı. 1942 sensi dekabr 13 künü öldürilgen olıp, arbiy safdaşları onı Smolensk vilȃyetiniñ Tsitsino köyünden uazq olmağa yerde fen ettiler. Babası – Umerov Amet ametoviç. Adresi: Qırım cumhuriyeti, Bağçasaray ş. Kalaostı soqağı, 15-nci ev.
Umerov Bekirniñ ciyanı – Venera Ablȃyeva Aqmescitte yaşay.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
