Bağçasaray rayonınıñ Alma Tamaq (Pesçanoye) köyü yanında yıqılğan terek, gaz borularını, elektrik ağlarnı zararladı ve neticede Volkswagen Polo arabası yandı.
Qırımda çalışqan Fevqülâde nazirliginiñ matbuat hızmeti bildirgenine köre, vaqiya gece, saat üçlerde yüz bergen. Adise yerine kommunal hızmetiniñ işçileri ve qurtarıcılar keldi.
«Belli olğanı kibi, selbi teregi yıqılğanı içün gaz boruları ve elektrik ağı telleri üzüldi ve yanğın yüz berdi. Peyda olğan yanğın, azbar içinde turğan arabağa keçti», — dep haber etile.
Yanğınnı tez söndürdiler, yaqında ösken tereklerge ve qurucılıq binalarına zarar kelmedi. Arabanı ise, qısmen qurtara bildiler. Yanğın neticesinde zararlanğanlar olmadı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
