Birinci ekranlarğa çıqqan «Hıdır dede» adlı qırımtatar masalı üstünde çalışqan icatkârlar, onı Qırım ve yarımadadan tış kinoteatrlarında köstermege planlaştıralar.
Bu aqta QaraDeniz Production studiyasınıñ kreativ müdiri ve film prodüseri Ayder Muradasilov haber etti.
Onıñ aytqanlarına köre, kinonıñ prezintatsiyası 2018 senesiniñ yanvar – fevral aylarında, Aqmescitte (Simferopol) olıp keçecek.
«Kinoteatrlerde köstermek içün, eñ evvelâ, prokat vesiqalarını almaq kerek, ondan soñ taqdim etilecek yeri ve kününi belgilemege mümkün. Kino masalnı, bizler em Qırım kinoteatrlerinde ve ondan tış yerlerde de köstermege planlaştıramız. Başqa devletlerde köstermek içün de vesiqalar azırlamağa tırışacamız», — dep Muradosılovnıñ sözlerini «AN-Krım» bildire.
Prodüser bildirgenine köre, filmde, baş ve epizodik rollerde 40 yaqın aktör iştirak etedir. Esas olaraq, bu Qırımtatar akademik muzıkalı – drama teatriniñ professionallarıdır.
Kütleviy sanalarda qararnen 700 insan iştirak etti, çekim taqımı 20 – 25 adamnen ibaret edi. Çekimlerimiz, Qırımnıñ eñ dülber yerlerinde keçti, bu Bağçasaray rayonınıñ Kökluz ve Qoş Degirmen köylerinde, Balaban Kanyon ve Manğup ormanlarında. Etnik mimarcılıq yerleri olaraq Bağçasarayda Han saray ve Derviş evi, Kezlevde ise, «Ceval» ve Dervişler Tekiyesi qullanıldı, Kökluzdaqı qırımtatar evi, ve Aqmescitteki «Alem» adlı etno kompleksı işletildi.
Muradosılov haber etkenine köre, leyhağa maddiy yardım olaraq QaraDeniz Production studiyasınıñ paraları ve iş adamları ile faalcilerniñ de yardımları oldı.
«Qırımtatar kollektsionerlerniñ de isseleri pek balaban edi. Olar ücretsiz olaraq, eski qırımtatar savut – sabasını ve daa çoq bir şeyleri taqdim ettiler. Bizim qaramanlarımız 18 asırda yaşaylar, bir tasavur etiñ! Etno binalar saiplerniñ de, isseleri soñsuzdır. Olarğa episine öz teşekkürlerimi bildirem!», — dedi prodüser.
Avdet haber etkeni kibi, QaraDeniz Production studiyası «Hıdır dede» adlı qırımtatar masalına film çıqarıp başladı. Masalnıñ stsenariysi üzerindet belli Qırım jurnalisti Lilâ Bucurova ve tarihçi ve alıpbarıcı Öleksa Gayvoronskiy çalıştılar. İkmetli qart Hıdır dedeniñ rolünde yırcı ve aktör Asan Bilâlov. Baş bala rollerini, «Canli Ses» istidatlar şousınıñ alıpbarıcıları Meryem İşçenko ve Safet Kübedinov icra eteler.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
