Miliy areketiniñ faali Ahtem Çiygoz, azat etilgen soñ birinci keresi babası Zeytulla Çiygoz ve oğullarınen körüşti.
Körüşiv, tunevin 5 noyabr künü, ATR telekanalında keçti.
«Soñki 10 kün içinde biraz tınçlanğan kibi oldım. Men bilmey edim, men tek ümüt ete edim. Men babamnı körip olamam, onı da anam kibi mensiz cıyarlar, dep qasevet ete edim», — dedi Ahtem Çiygoz.
Zeytulla Çiygoz ise, oğlunıñ qurtarılması içün dua ete edi. Ahtem beyniñ anası bu daqqalarnı körip olamağanından pek kederlendi.
«Egerde meni apayım daa bir qaç ayçıq yaşap olğan olsa, toşekte yata olsa bile, men oña: «Baq oğluñnı azat ettiler», dep aytar edim. Eger oğlunı körgen olsa, ölümi sakin olur edi. Men oğlumnı üç yıl körmedim. Onı körmek meni pek balaban arzum edi. Kelmemek imkânsız edi. Men keldim, ve oğlumnen qarşılaştım. Elbette, men bahtlım», — dedi o.
Ahtem Çiygoznıñ üç yıl körmegen oğulları da, babası Qırımğa qaytacağına ümüt eteler.
Hatırlatamız, 2 iyül künü, Qırımda, devamlı hastlıq neticesinde Ahtem Çiygoznıñ anası Aliye vefat etti. 20 iyün kün, advokatları tarfından, Ahtem Çiygozge hasta anasınen körüşmege imkân berdiler.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
