Qırımtatar milliy areketiniñ faali İlmi Ümerov salı 7 noyabr künü, «Avropa hatırası ve insafı platforması» namlı mukâfatnı almaq içün Parijge uçıp ketti.
Bu aqta, 6 noyabr künü, Kiyevde press – konferentsiya devamında. Qırımtatar resurs merkeziniñ başı Eskender Bariyev bildirdi.
Onı qayd etkenine köre, İlmi Ümerovnıñ namzetini Qırımtatatar resurs merkezi ve milliy Meclisniñ (Rusiyede yasaqlanğan) teşebbüsi ile taqdim etken ediler.
«İlmi Ümerov bu mukâfatnıñ lauriatı oldı. Onıñnen beraber, finalğa Rusiyeden Vladimir Kara – Murza, Qıtaydan Nobel mukâfatıtıñ ömür arqadaşı, belli uquqçı da çıqqan ediler. Amma İlmi Ümerov bu mukâfatnı qazandı, ve yarın bizler onı almağa ketecekmiz», — dep qayd etti Eskender Bariyev.
«Avropa hatırası ve insafı platforması»nıñ resmiy saytında, haber etilgenine köre, İlmi Ümerov bu mukâfatnı «totalitar rejimine qarşı, demokratika içün alıp barğan küreşi, insannıñ aqları ve uquqnıñ üküm sürmesine yapqan işleri içün» taqdirlene.
Mukâfatnen taqdirleme merasimi 8 noyabr künü, «Kommunizmge 100 yıl. Tarih ve hatıra» adlı platformanıñ konferentsiyasında olıp keçecek.
Avdet haber etkeni kibi, Ümerov ve Çiygoznı 25 oktâbr künü, farqlı arabalarda Aqmescitniñ ava limanına alıp keldiler, Ümerovnı Bağçasaray hastahanesinden alıp kelgen ediyelr, anda o, 20 oktâbr künü, «acele yardım» ile tüşken edi. Ondan soñ, ekisinide akimiyet uçağına oturtıp, başta Anapağa, soñra ise, Turikiyeniñ paytahtı Ankarağa ketirdiler. Ankarada Ümerov ve Çiygoz, Turkiye prezidenti Recep Tayip Erdoğannen körüştiler. 27 oktâbr künü ise, azat etilgenler Kiyevge keldiler.
İlmi Ümerov ve Ahtem Çiygoznı. Bu yılnıñ sentâbr ayında ek ive sekiz yıl apis cezasına oğartqan ediler. Çiygoz Qırımnıñ Yuqarı Radası yanında 2014 senesiniñ 26 fevralinde keçirilgen aktsiya vaqıtnda «kütlefiy qarışıqlar teşkilâtçısı» olaraq qabaatlı tanıldı (RF ceza qanunnayesiniñ 212 maddesi, 1 qısım). Ümerovnı ise, eki yıl müstemleke yaşaması cezasını berdiler. Oña bu ceza ATR kanalınıñ efirinde «Sanktsiyalar Rusiyeni Qırımda ve Donbasstan ketmege mecbur etmek kerekler», degen sözleri içün berilgendir. FSB hadimleri tarafından, Ümerovnıñ bu sözleri, Rusiyeniñ birdemligini bozmağa çağıruv kibi, baqılğan edi (RF ceza qanunnayesiniñ 280.1 maddesi, 2 qısım).
Foto: Radio Svoboda
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
