Qurtarıcılar, Aqyar devlet universitetiniñ merkeziy binasınıñ mağazında olğan yanğın sebebinden biñden ziyade studentni tahliye ettiler.
Bu aqta Aqyar boyunca çalışqan fevqulâde nazirliginiñ matbuat hızmetinde haber ettiler.
«Azbarğa 1,2 biñ student çıqarıldı. Pek çoq tütün olğanı sebebinden sekiz insan binadan çıqamay qaldı. Yanğın söndüriciler, mahsus maskalar taqıp, insanlarnı taze avağa çıqardılar», — dep aytıla haberde.
İdarede aytqanlarına köre, yanğın aqqında haber saat 9.00 keldi.Ateş mağazda peyda olğan. Yanğın meydanlığı 10 kare metr teşkil etti. Qurtarıcılarnıñ haber etkenine köre, yanğın sebebi – qısqa qapalma olması mümkün. Zararlanğanlar yoq, dep haber ete «Krıminform» neşiri.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
