23 noyabr künü Qırımnıñ bir qaç rayonında qırımtatar milliy areketi faalleri, Bekir Degermenci, Asan Çapuh, Kâzim Ametov ve Kurtseit Abdulayevlarnıñ evlerinde tintüvler olıp keçti. Tintüvlerden soñ faallerni yaqaladılar. Şimdiki vaqıtta olar tevqifhanede bulunalar. Taqiqatçılar aytqanlarına köre, sıñırlama tedbirlerini eki kün içinde seçecekler.
Bu aqta «Radio Svoboda» muhbri haber ete, dep bildire «Qırım.Aqiqat».
Sudaq yanındaki Gruşevka köyünde, Bekir Degermenciniñ evinde tintüv keçirildi. Bekir Degermenci «26 fevral işi» boyunca qabaatlanğan Mustafa Degermenciniñ babası. Birazdan Bekir ağa özü de, Aqmescitte Vorovskogo soqağında, Kiyev rayon mahkemesi yanında yerleşken «Medoborı» kafksinde yaqalandı.
Gruşevka köyünde bir tintüv daa qırımtatar faali Kâzim Ametovnıñ evinde keçirildi. Onıñ evi yanına dört dane quvetçiler tolu araba keldi.
Kefe yanındaki Yujnoye köyünde Elmira Gaziyevanıñ evinde de tintüv keçirildi. Onıñ evinede dört dane quvetçiyer tolu araba keldi. Tintüv Elmira hanım evde olmağan vaqıtta alıp barıldı.
«Quvetçiler boş evge kirip keldiler. Elmira aqayınen evde yoq edi. Bu evde yaşağan babası keldi, amma onı evge yibermediler», — dep haber «Radio Svoboda»nıñ mühbiri.
Bir tintüv daa Asan Çapuhta keçti.
Tintüvlerden soñ, quvetçiler Bekir Degermenci, Asan Çapuh, Kâzim Ametov ve Kurtseit Abdullayevnı yaqaladılar.
Hatırlatamız, Aqmescitte 83 yaşında, qırımtatar milliy areketiniñ veteranı Veciye Kaşka vefat etti. Aqmescitniñ merkezinde, qırımtatar faallerini (Bekir Degirmenci, Asan Çapuh, Kazim Ametov) yaqalağanları vaqtında Veciye Kaşka özüni yaramay duydı. Olıp keçken vaqialar yerinden onı acele yardım arabası alıp ketti. Rusiyeniñ Qırımda çalışqan FSB idaresi yaqalanğanlarnı, Türkiye vatandaşından «balaban kölemde para cerrarlığında» qabaatlaylar.
Nariman Celâl vaziyetni böyle añlatı: Türkiyeniñ vatandaşı, paranı Veciye Kaşkadan qırsızladı, faaller ise, onı qaytarmağa yardım etecek oldılar.
«Türkiye vatandaşı Yusuf Aytan, aferacıdır, o bir qırımtatar aylesiniñ(Veciye Kaşkanıñ aylesine – muarririyet qayd ete) işançına kirdi ve olardan balaban kölemde para qırsızladı. Yaqalanğan faaller ise, bu ayleniñ probleması aqqında bilip, türknen paranı qaytarıp bermesi aqqında laqırdı ete ediler. Neticede, ya türk özü bu vaziyetten qullanacaq oldı, ya da quvetçiler, bu faallrge tesir etmek içün, vaziyetni qullandılar», — dep ayttı Celâl.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
