Sekiz qırımtatarnı öz başına piketke çıqqanları içün cezalamağa isteyler

28.11.201712:54

Qırımda sekiz qırımtatar faaline, 14 oktâbr künü öz başına piketlerde iştirak etkenleri içün memuriy ceza işlerini açtılar.

Bu aqta 27 noyabr künü, Facebook saifesinde advokat Emil Kürbedinov öz video muracaatında haber etti.

«Bizler şimdi Krasnogvardeyskte bulunamız. Bugün sekiz adamnı polis idaresine çağırdılar. Bu 14 oktâbr künü öz başına piketke çıqqan insanlar. Polis hadimleri, olarnı qanun bozğanlardır, dep esaplaylar. Olaprğa qarşı memuriy ceza işlerini başldılar. Bu Rusiyeniñ memuriy qanunbozuvlar Kodeksiniñ 20.2 maddesiniñ 5 qısımı», – dep ayttı advokat.

Olarnı episini kütleviy merasmiler keçirüv qaydelerini bozuvda qabaatlaylar.

Kürbedinovnıñ bildirgenine köre, bu areketler, ileride öz başına piketlerge çıqacaq olğan insanlarnı qorqutmaqtır.

Advokatnıñ haber etkenine köre, mahkeme oturışı keçirilecek künü aqqında daa bildirecek.

Hatırlatamız, 14 oktâbr künü, Qırımnıñ bir sıra regionlarında, qırımtatarlarnıñ kütleviy şekilde yaqalanğanlarına qarşı, öz başına piketler keçirildi. Aktsiyalar Sudaqta, Canköyde, Qarasuvbazarda (Belogorsk), Kefede (Feodosiya), Aluşta ve Aqmescitte (Simferopol) olıp keçti.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası