Ukraina prezidenti P. Poroşenko grigorian taqvimi boyunca Milât bayramı qutlanğan 25 dekabr kününi raatlıq künü ilân etilmesi içün qanun imzaladı.
Yuqarı radanıñ matbuat hızmeti haber etkeni kibi, Poroşenko bu veskianı 29 noyabr künü imzaladı.
Bu qanun, derc etilgen kününden başlap, işke tüşe.
Yuqarı Rada 16 noyabr künü 25 dekabr kününi raatlıq künü ilân etmek içün qanun leyhasını tasdıqladı. Belli olğanı kibi, bu künü grigorian ve yañı yulian taqvimleri boyunca Milât bayramı qayd etile. Bu vesiqağa köre, 2 mayıs bayram künü lâğu etile, 1 mayıs ise, Emek bayramı olaraq qala.
Ukrainada 7 yanvar raatlıq künüdir, bu künü yulian taqvimi boyunca Milât bayramı qayd etile. 25 dekabr künü ise, Ukrainada iş künü edi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.