2-nci mayısqa ne azırlana?

01.03.202022:50

Halqara qararlar becerilmey

Keçken sene dekabrniñ başında, 2016 s. Rusiyede yasaq etilgen (Birleşken Milletlerniñ Halqara mahkemesi onı lâğu etilmesine qarar çıqardı) Qırımtatar Milliy Meclisiniñ reisi Refat Çubarov «Degerlik yürüşi. Dünya – zorbalıq ve zapt etüvge qarşı» tınç usulda qarşılıq köstermek aktsiya ötkerilecegini bildirgen edi.

Yaqında o, aktsiyanıñ künü belgilengenini – 2-mayısta olacağını ayttı. Aktsiyada Ukrainada yaşağan cemaatçılar, Ukraina halq deputatları iştirak etmeleri közde tutula. Ondan ğayrı, halqara teşkilâtlarınıñ vekilleri de davet olunacaq. Yürüşçiler Ukraina tarafından şimdiki sıñırnı keçip, Qırımğa kirmeleri közde tutula. «Rusiye qırımtatarlarnı olarnıñ topraqlarından sıqıp çıqarmağa tırışa ve bu halqımıznıñ saqlanması içün kerçek telükedir», – Mustafa Cemilev bu yürüşniñ (marş) ög sıralarında yaşı 73-ten keçken (insan yaşayışınıñ bugünde orta devamı) vatandaşlarımız olmasını teklif etti, «çünki özüni nasıl alıp baracağını kimse bilmegen devletnen iş tutamız». «Bu yaş çağından keçkenim sebebinden men de mıtlaq şu sırada olacam», – dedi o.

Onıñ fikirince, tedbirge çoq Ukraina halq deputatları qoşulacağı beklenile. Avroparlament ve AHİT (ÖBSE) deputatları da davet etilecek. Belki de, bir qaç amerika kongressmenleri olur. «Esas ğaye bunda: Birleşken Milletler, AHİT, AŞPA (PASE) ve ilâhre – endi zapt etüvniñ qanunsızlığını tanıdılar, amma bu qararlardan iç birisi becerilmey. Böyleliknen, biz olarnı davet etemiz: vaziyet nasıl olğanını baqsınlar…», dedi M. Cemilev.

Rusiye akimiyetiniñ Qırımdaki yolbaşçıları aktsiya ötkerilecegini eşitip, buña bayağı açuvlandılar. S. Aksenov, aktsiyağa fitnecilik, dep qıymet kesti. Onıñ iştirakçilerine qattı qarşılıq kösterilecegini işandırdı. Sabıq prokuror, bir sıra körümli insanlarımızğa doğmuş yeri – ecdatlar toprağı Qırımğa kirmekni yasaq etken, kirmemek şaraitlerni yarattırğan müstemlekeci-hanım Poklonskaya tınç yürüşçilerni sıñırda «avtozak»larnen qarşılacağını bildirdi.

Episinden ziyade ise aktsiya munasebetinen rusiyelilerni qorquzmaqta, işte, bir aramızda eñ qopay, qaba, aşaa tarafından belli olğan ve daa nasıl yollarnen yüksekten-yüksek maaşına mukâfatlar almasını gece-kündüz tüşüngen deputat tırıştı. Onıñ aytqanlarını olğanı kibi RBK portaldan alıp beremiz:

«Mudafaa ve hafsızlıq boyunca Federatsiya Şura komitetiniñ azası Ölga Kövitidi «Qırımtatar Milliy Meclisi» teşkilâtınıñ terkibinde İD («İslâm Devleti» – Rusiyede yasaq terroristik teşkilâtı)  terroristleri buluna dep saymaqta. Onıñ sözlerine köre, bu teşkilât esasında  «cenkâver milletçilik otrâdları» teşkil olundı. Bu otrâdlar «Qırım ormanlarında yerleştirme» yapa, arbiyleştirgen idman» keçire, ayrıca,  «silâ qoyma, toldurmasını» yapa ediler” .

Aydı, bularnı özüñiz biri-biriñizge izaatlañız, sayğılı oquyıcılar.

B. Accı.

Фото аватара

Автор: Редакция Avdet

Редакция AVDET