Ukraina prezidenti Vladimir Zelenskiy Qırımtatar Milliy Meclisiniñ (26 aprel 2016 senesinden berli Rusiye ve Qırımda yasaq olğan) öz qanuniy, 2014 senesinde kerçekleşken qırım vaqialardan evel Aqmescit şeeriniñ Şmidt soqağında yerleşken binasına yaqında qaytacağını işançnen ifade etti.
Bu aqqında Zelenskiy 26 fevral künü Kiyevde keçirilgen Age of Crimea forumında yapqan çıqışta bildirdi. “Bizim çempionımız Aleksandr Usikniñ (Qırımdan boksçu – muarrir yazısı) Suvdağda uruş keçireceginden, Camalanıñ (yırcı – muarrir yazısı) Köktebelde kontsert bereceginden, Oleg Sentsovnıñ (rejissör – muarrir yazısı) Yaltada yañı filmni taqdim eteceginden, Qırımtatar Milliy Meclisiniñ ise (Rusiyede yasaq – muarrir yazısı) Aqmescit şeeriniñ Şmidt soqaqındaki eki nomeralı evge qaytacağından eminim. Bunı biz Yaltadaki Lesâ Ukrainka eykeli ve Aqmescitteki İsmail Gasprinskiy eykeliniñ yanında qayd etermiz”, – dedi Zelenskiy.
Ayrıca, Qırım meselesiniñ kün mevzusından çıqmağanını ve “Donbassta barış içün bedel” olamacağını bildirdi.
Bundan ğayrı, Zelenskiy er yıl 26 fevral künü devlet seviyesinde qayd etilecek «Rusiye işğaline qırım qarşılıq künü» degen fermanınıñ imzalanğanı aqqında bildirdi. «Bugün menim tarafımdan «Muhtar Qırım Cumhuriyeti işğaline qarşılıq künü» fermanı imzalanmaqta. Bu kün er yıl 26 fevral künü qayd etilecek», – dedi Zelenskiy. Age of Crimea forum çerçevesinde insan aqlarınıñ bozulma kerçekleri ve Qırım tamır halqlarınıñ aqlarınıñ riayet etilme vaziyeti, ayrıca Qara deñiz regionınıñ hafsızlıq meselesi muzakere etildi.
Kreml, öz nevbetinde, Ukraina idareleriniñ «Qırım işğaline qarşılıq künü»ni belgilemeleri yarımadadaki vaziyet kerçekligine uymay dep beyan etti ve böyle ifadenen razı olmağanını bildirdi.
