Dobruca teessuratlarım

07.05.202013:23

Qırım radiosınıñ muarriri Server Bekirov Romaniya vatandaşlarımıznıñ uzurında bulunıp, unutılmaz teessuratlarnen qaytıp keldi. Onıñ bir sıra maqaleleri, bu cumleden tarihçı-alim Tasin Cemil, Butündünya qırımtatarları kongressiniñ sabıq idare azası Salâdin Aciaqay ve Dobrucanıñ körümli yazıcısı Neriman İbraimnen olğan subetleri «Qırım» gazetinde basılğan edi. Bu saifede ise onıñ Romaniyada qırımtatarlar  birleşmesiniñ reisi, Butündünya qırımtatarları kongressi idaresiniñ azası Varol Amet, Musülmanlarnıñ muftisi Murat Yusuf, Parlament vekili Amet Alâdin, azlıq milletler boyunca ukümet mesleatçısı Necat Sali, Kostel qasabasınıñ golovası Cevat Kerim, aytuvlı yazıcı Guner Aqmolla, belli alimler Eden Maмut ve Tasin Cemil, namlı fermer Unal Mambet, meşur sanatkâr Aydın Celil ve keçken sene rahmetli olğan  büyük cemaat erbabı Salâdin Aciaqaygğa bağışlanıp yazılğan epigrammalar derc etile.
Server Bekirov

Güner Aqmollağa  

Güner Aqmolla –
Qırımtatarı,
«Milletim – Qırım» –
Onıñ şiarı.  

Vatanğa kelip
Tarihın yaza –
Tatar keçmişin
İnenen qaza.  

Er bir işte
Halqqa bazana –
«Emel»ni tiklep,
Savap qazana.  

Yapqan işlerin
Qıymeti büyük –
Nazik qadınçün
Pek ağır bir yük.  

Onıñ astından
Bu insan çıqar –
İcadın quveti
Kederni yıqar.  

Roman ilinden
Tarihçı-yazar
Milliy keneşte
Faal bir aza.  

Eden Mamutqa
Asabalıqımız zengin  

Tüşüncede
Dostum Eden.
Başı qata –
Bilem neden.  

«Roman tatar»
Coydı ilin,
Coya yata
Tuvğan tilin…  

Til bilgenler
Ep eksile –
Zaman halqnıñ
İzin sile.  

Milletimiz
Cesür olğan.
Onçün hanlar
Meşür olğan.  

Ecdatlardan
Bir ediye –
Roman ilde –
Mecidiye.  

Keçmişinden
Bir hatıra,
Ümütlerni
Ep arttıra.  

Milliy ğurur
Raatsızlay –
Accı dertten
Yürek sızlay.  

Mevcut zengin
Mirasımız.
Ya til bilgen –
Pek azımız.  

Til bilmemek
Fenaallıq,
İnsan içün
Masqaralıq.  

Til bilmemek –
Zır caillik,
Millet içün
Bir hainlik.  

Tilimizni
Ögreneyik,
Bilmemekten –
İgreneyik.  

İşke tezce
Kirişeyik,
Maqsatlarğa
İrişeyik!  

Qırım degen
Tilge coşıñ –
Ğurur ile
İsse qoşıñ.  

Unal Mambetke
Fermer Ridvan* dostuma  

Sport eglence degildir –
Regbide bu biline,
Can küydürip oynasañ –
Tanılasıñ iliñe.  

As sportçılar içün de
Bir künü ola «final»,
Bir şey ebediy degil –
Bunı bilesiñ, Unal.  

Onçün biraz tırışıp,
Barlıqlı fermer boldıñ,
Yaz-qış demey çalışıp,
Elâl hocalıq buldıñ.  

Sen saçqan boğdaylarıñ
Bol bereket berecek.
Dobruca tatarınıñ
Er birine yetecek.  

Sen beslegen sığırlar
Bütün köyni baqacaq,
Artıp qalğan sütleri
Tükânlardan aqacaq.  

Gece-kündüz qıbırdap,
Taze penir aşaysıñ.
Gülşen adlı hanımnen
Raat-raat yaşaysıñ.  

* Ridvan – Alla Taalânıñ
razı oluvı, begenüvi.
Tarihımıznı yazayıq
Tasin Cemilge  

Romaniya mekânınıñ
Azer konsulı boldıñ,
Büyük tatar diyarınıñ
Bir qısımını buldıñ.  

Türkmen başı ilinde de
Büyük elçilik yaptıñ,
Bu milletniñ tilinde de
Kop yaqınlıqlar taptıñ.  

Amma Qırım – Vatanıñdır,
Baba-dedeñniñ ili,
Seniñ tüşünce añıñdır –
Ecdat, anañnıñ tili.  

Bügün Qırım saña muhtac —
Sen onı qayğıracañ.
Gecelernen köz yummayıp,
Tarihını yazacañ.  

Sen bu işni yapalmasañ –
Halqım saña darılır.
Millet içün yapqanlarıñ
Ebediyen añılır!  

Saladin Acıaqayğa  

Aqay bolğan soñ —
Halq bahtın quracañ,
Aqay sözünde
Qayaday turacañ.  

Millet sözüni
Qattı tutacañ,
Ağırlıq etse
İndemey yutacañ.  

Qırım oğrunda
Acıma özüñni,
Tañrı yolunda
Odep ket sözüñni.  

Tatarğa sevgiñ
Qalbiñden taşqanda.
Elâl işleriñ
köklerge aşqanda  

Pak niyetlerle
Dualar da etem –
Sen milletiñe
Aqiqiy cetemen.  

Halqta sen kibi
Cigitler kop bolsın,
Vatanım Qırım
Olarnen tolsın.  

Millet bahtını
Cüregiñden ada
Seniñ artıñda
Muqaddes bir Ada!  

Necat Salige
Küreşke küreş qoştıñ  

Sen yapqan cümertligiñ
Tillerde oldı destan,
Eyilik sebepçisi –
Ebet te, Ana-Vatan.
 
Milletiñe qol tutıp,
Kostenceden kelesiñ.
Qırım hatırın tapıp,
Ne yapmaqnı bilesiñ.
 
Devletçilik oğrunda
Davamıznı añlaysıñ.
Küreşerek yeñmesek,
Sen de bizday qaynaysıñ.  

Küreşke küreş qoşıp*,
Ruhumıznı köterdiñ.
Dobruca pelvanların
Ana-Yurtta kösterdiñ.  

Küreşten çetleşmesek
Er bir işte yeñermiz,
Devletçilik bahtına
Bir kün ola yetermiz!  

*Küreşke küreş qoşıp –
milliy davağa sport
kureşi koşıp manasında  

Murad Yusufqa  

Tañrıdan bir emanet
Qozğadı eyecannı,
On daqqalıq sükünet
Basıp aldı meydannı.  

Romaniyalı imam
Dua-hatimni qıldı,
Bizlerde olğan iman
Tolusınen açıldı.  

Millet boyle sarılsa
Alla yolundan keter,
Din kütilip barılsa
Halq arzusına yeter.  

Cevat Kerimge        
Merlik  

Katerina Qırımnıñ
Başına yetken.
Halq Vatannı terk etip,
İcretke ketken.  

Dobrucanı pek süyüp,
Millet urulğan.
Ocaqları tutaşıp,
Kostel qurulğan…  

Mında yolbaşçı olmaq –
Quvançlı bir al,
Öz işiñden baht bulmaq
İnsanğa mecal.  

Yaş nesilni celp etip,
Derslerni başla –
Talebelerge ana
Tilini aşla.  

İşlerni yolğa salıp,
Qırımnı qayğır,
Onıñ tutqan işleri
Bügün pek ağır.  

Vatan ayaqqa tursa,
Millet oñacaq.
Roman tatarına da
Qolay olacaq…  

Varol Ametke  

Çareli dünânıñ
çaresi tapılır      

Devlet şanı
Kopten söndi,
Bağçasaray
Tilge döndi.  

Yavur Katrin
Irım  qıldı,
Vahşiy Suvor
Halqnı qırdı.  

Yarım Qırım
İcret oldı —
Roman ili
Tatar toldı.  

Qadim diyar
Qabul etti,
Aş-suv ile
Yardım yetti.

Çare bulğan
Mında qaldı,
Topraq alıp
Uyler saldı.  

Dobrucada
Ocaq taptı,
Özü içün
Mekân yaptı.  

Bugün olar
Bizge qaray –
Ana-Vatan
Yolun aray.  

Ğarbiy taraf
Qırımtatar
Butün ömür
Qırımğa zar.  

Asret bolıp
Tuvğan ilge,
Sadıq qaldı
Ana tilge.  

Hanlıq devri,
Belki, döner,
Asret derdi
Özü söner!..  

Amet Aledinge  

Millet vekili olmaq –
Ğayet büyük itibar,
Halqqa eyilik yapmaq
Bizim qanımızda bar.  

Qırımlarnı qayğır, dep
Saña rica etemen,
İşiñ oñ kelmesini
Dua etip isteymen.  

Aqiqiy fedakârlar
Millet içün yaşarlar,
Ösip yetken evlâtlar
İşlerine şaşarlar!  

Aydın Celãlğa  

Kel, beraber, “Biz Qırımdan
Ketkende…”ni cırlayıq.
Efkârlanıp, Qara deniz
Yalısında cılayıq.  

Vatan içün qurban ketken
İnsanlarnı añayıq,
Ruhlarına dua oqup
Savapların alayıq.  

Baba-dede vasiyetin
Bir vaqıt unutmayıq,
Devletçilik oğrundaki
Küreşni suvutmayıq…


Фото аватара

Автор: Редакция Avdet

Редакция AVDET