Bekir Çobanzadeniñ doğğan kününe

11.05.202014:14

15 mayıs 2020 senesi, türk dünyasınıñ büyük aqıllarınıñ Bekir Çobanzadeniñ doğğanından 127 yıl tola.

Alim, pedagog, şair, o, alman, macar, fransız, arap, fars tillerini mükemmel, aman-aman bütün türk tillerini bile edi.

Farqlı yıllarda Tavriya, Azerbaycan üniversitetlerinde çalışıp, Şarq halqlarınıñ İnstitutınıñ, Azerbaycan ilim Akademiyasınıñ, Paris tilşınaslıq cemiyetiniñ kerçek azası olıp, o, qocaman ilmiy, usuliy, edebiy-bediiy bir miras qaldırdı.

Bekir Çobanzade azerbaycan tilşınaslıqnıñ qurucısı, özbek, qumıq, balqar, qırğız, qırımtatar edebiyatınıñ meşur mütehassısı oldı. Onıñ tarafından çeşit tillerde, türkiy tiller ve edebiyatlar meseleleri boyunca 150-den ziyade kitap ve maqale basıldı.

Ayatınıñ soñ yıllarında Çobanzade Bakuda yaşadı, amma bu onı qırımtatar ziyalılarnıñ usuliy yoq etme başlağan yılları qurtarmadı.

28 yanvar 1937 senesi Bekir Çobanzade Kislovodskta yaqalandı ve konvoy altında Bakuğa yollanıldı. Onı «aqisinqilâp faaliyetinde» qabaatladılar ve qurşun cezası ükümüni berdiler. Üküm deral – 13 oktâbr 1937 senesi yerine ketirildi. Ve tek 20 yıl soñra – 1959 senesi kene de onıñ, amma tek «Qırım» sözü keçmegen şiirleri dünya yüzü kördi.

Foto: İsmail Gasprinskiy adına qırırmtatar kütüphanesi

Фото аватара

Автор: Редакция Avdet

Редакция AVDET