Qadir gecesi

08.05.202119:02

«Qadir» – pek qıymetli, pek qadirli, pek ürmetli demektir.

Bu geceni qadirli bir kitap, qadirli bir melek vastasınen qadirli bir ümmetke endirilgen. Şunın içün be gece qadir gecesi denilgen.

İslâm aleminde aylar arasında Ramazan ayı, künler arasında Cuma künü, geceler arasında Qadir gecesi eñ mubarek ve eñ muqaddes vaqıtlar dep qabul etilgen. Qadir gecesi biñ aydan hayırlıdır (Qadir suresi, 3-ünci ayet) olğanı içün bütün künlerden ve gecelerden qıymetli ve emiyetlidir.

Biñ aynın manası musulmanlarnıñ bu geceni biñ aylıq ibadet sevabını qazanacaqları añlatıla. Qadir gecesi künler ve aylarnen teñeştirilmez. Bu gecesi, geceden sabağa qadar biz bilmegen nice ikmet ve sevaplar bardır.

«Biz, Onı (Qurannı) qadir gecesinde endirdik. Qadir gecesiniñ ne olğanını sen bilesiñmi? Qadir ayı biñ aydan daa hayırlıdır. Melekler ve Ruh (Cebrail) o gecede, Rableriniñ izini ile er türlü iş içün ener de ener. O gece, tañ yeriniñ ağarmasına qadar devam etken bir selâmettir» (Qadir suresi 1-5 ayet).

«Qadir» suresindeki ayetlerden añlaşılğanına köre, bu gece melekler ve Cebrail aleyhisselâm yer yüzüne tüşeler. Yer yüzünde millionlarnen musulmannıñ, temiz göñülden Allahqa tabınıp ibadet qılğanlarını ve dua etkenlerini köreler. Qıyamet kününde ibadet etken bu musulmanlar tanılğan olurlar. Bu gece böyle mubarek ve şerefli gecedir, kökte yaşağanlar yerde yaşağanlarğa suqlanırlar.

Qadir gecesi Ramazan ayınıñ soñki 10 künü arasındadır. Qadir gecesiniñ angi gece olğanı temelli etip belgilenmegen. İslâm alimleri Peyğamberimizniñ (s.a.v.)niñ bazı hadislerine bazanıp, bu gecenin Ramazannıñ 26-27-nci gece olğan dep esaplaylar.

Peyğamberimiz (s.a.v.) Ramazan ayında ibadet ve dualarını daa da arttıra, belki de Ramazannıñ soñki 10 kününde, pek az yuqlay, gece-kündüz ibadet yapa edi. Belki, musulmanlar da bu 10 künni, mümkün qadar şereflerini ve ibadetlerini arttırsınlat dep, Qadir gecesiniñ temel vaqıtını sır olıp saqlağandır. Hazreti Ayşe Peyğamberimiz (s.a.v.)den sorağan: » Ey, Allahnıñ elçisi, Qadir gecesine irişsem, nasıl dua eteyim?» Peyğamberimiz (s.a.v.) aşağıdaki duanı oqu degendir: «Allahumme inneke afuvvun kerimun tuhibbul afve fa’fu anni», yani » Allahım, sen afu eticisiñ. Afu etmege seversin. Meni de afu et».

Qadir gecesinde qadirli etilgen eki muim vaqia da olğan:

– Hazreti Muhammedniñ Peyğamberlik vazifesi bu gecede başlağan;

– Ulu kitabımız Quran birinci bu gecede endirilip başlağandır.

Biñ aydan da hayırlı olğan bu geceni ğafletnen keçirmege büyük hata olur. Onın içün yılda bir kere kelgen bu geceni ibadetler, dualar, tövbelernen ozğarmaq kerektir.
Peyğamberimiz (s.a.v.) bir hadisi şerifinde böyle degen: «Kim Allahqa inanıp, em sevabını Allahtan beklep Qadir gecesini ibadetnen keçirse, o insannıñ işlegen günahları afu etilir».

Menba: Acı Nuri efendi Mustafa oğlu «İslâm dini ilmihalı»

Фото аватара

Автор: Редакция Avdet

Редакция AVDET