Birinci qavğa

07.07.202018:02

Oğlan balanıñ ayatında eñ müim adiselerden biri — ilki qavğa ve birinci dögüştir. Sebebi ne olsa olsun, qalğan yaşayışına tesir etecek, hatta onıñ ketişatını belgileycek maiyette olğan bu talaşma, em balanıñ tabiatındaki zayıf noqtalarnı kösterir, em de er kişi olaraq ösmesinde faydalı olur. Çünki etraftaki insanlar, işte bu eñ birinci ve eñ müim qavğanıñ neticesine köre öz tavır ve munasebetlerni inşaa etecekler. Demek, yaş bala, kötek aşasa bile, ya qorqaqlığına ğalip kelgen soñ itibar qazanıp, özüni aqay olaraq körecek, ya da içindeki duşmanğa mağlüp tüşip aşşalanacaq, afu etiñiz, sıçqaq erif olaraq cemiyetniñ eñ arttaki saflarında öz yerini alacaqtır.

Sürgünlik faciasından soñra qırımtatar oğlanlarıñ birinci kötekleşmesi ekseriyetnen «satqın» ve «hain» tamğası ve aqaretinen başlağandır. Teessüf ki, 70 yıldan berli devam etken bu vaziyet deñişe bilir degen bir alâmet yoq. Lâkin, bu meseleniñ müsbet tarafı şu ki, bizim ballar yigit kibi yigit, aqay kibi aqay olıp öseler. Qorantası, vatan toprağını, milleti, din ve medeniyetini qorçalay bilecek em ruh, em bedenden küçlü, cesür, qorqu bilmez ve mert erler olaraq halqnıñ ögünde turalar.

Bu ciyetten daa bitmegen şu Avdet devirinde, ister Qırımda kelmeşek olıp yaşağan soysız eali, ister duşman közünen baqqan şovinist yerli idare, ister şübeli nazarnen taqib etken merkeziy iqtidar olsun – bularnıñ episi esas sebepçi olıp, er daim birinci olaraq qaşanıp, şu qavğalarnı birinci olaraq başlatqandır. Olar böyle sürette qanlı ve ateşli çatışmanıñ çıqması içün er ne qadar tahriq etken olsalar da halq, öz küreşini qanun, intizam ve siyasiy-içtimaiy dava çerçivesinde alıp barmağa küç sarf etkendir. Nitekim, Milliy Areketniñ ilki ve eñ esaslı ümdesi (printsipi) olğan qansız, qavğasız ve şiddetsiz mucadele mefküresi, Vatanğa qaytqan soñ daa büyük emiyet qazandı ve halq oña daa çoq talapkâr oldı.

Bazı aqılzedeler ve ahmaqlar bunı qorqaqlıq ve zayıflıq olaraq qabul eteler. Amma milliy tarihımıznıñ qaysı bir devirine baqsañız, er birinde, menbası din-imanımız ve milliy ananemiz olğan basiretli ve ferasetli cüret, cesaret ve yüreklilik körersiñiz.

İşte 26 fevral ve 3 mayıs adiseleri bu hususiyetimizni yañı tarihte umumcianğa aks etken eñ parlaq ve şübege yer qaldırmağan soñ derecede emiyetli vaqialardır. Kerekli zaman ve zeminde azır cevap olıp, vaziyetke köre eñ doğru arekette bulunğan ve varlığını gür sadanen duyurğan halqımız kimniñ ne qıymette olğanını açıq-aydın sürette el-alemge numayış etti.

Amma yañlış añlaşılmasın, bu areketler birisiniñ közüne kirmek içün numayış ya da kösteriş degil, yalıñız ve ancaq öz Vatanı, medeniyeti ve milletni qorçalamaq içün yapıldı. Zira qırımtatarlarnıñ, qırımlılarnıñ Yüce Yaratıcıdan  ğayrı iç bir kimsege borcu ve minneti yoqtır. Hatta özüni bu topraqnıñ saibi sayğanlardan da bayağı alacağı vardır. Bunıñ yanında

Qırımtatarlarnıñ, bir de bir şahıs yahut devlet, yahut da umumcian seviyesinde iç bir kimsege iç bir şeyni isbatetmege ihtiyacı da yoqtır. Ne «hain» ve «satqın»lıqnı silmek, ne de birisine vefa ile bağlılıqnı beyan etmek kibi derdimiz olmamalı. Halqımız mustaqil ve mustağniq almalı. Kimseden bir şey beklemeyip, öz işini daima özü yapmalı, el uzatıp tilencilik yapmaq kibi adetten vazgeçmeli. Bizni özünden bilgen, aqran ve arqadaş körgenler buyursınlar – öyle şerefli musafirler içün qapularımız daima açıq, sofra ve iqramlarımız er vaqıt azırdır.

Halqımıznıñ davası – tamırları milâttan evel bilmem qaçıncı asırnıñ terenliklerine qadar uzanıp boy atqan Qırım teregi içün uyğun şarait meydanğa ketirmektir. Onı baqıp, suvarıp, asrap qara asırlardan soñ tekrar çeçek açması ve meyva vermesi, Sürgünlik ve Avdetten soñra niayet Devlet devirniñ kelmesi  içün ğayret köstermektir. Bu işke qoşulıp yardım etmege istegenler buyursın kelsin, olarnıñ destegi zayi ketmez, ziyadesinen özlerine qaytar. Yardımdan çekingenler eñ azdan kenarda turıp keder etmesinler. Bizni körecek közü olmağanlar, zulüm ve zorbalıqtan taraf olğanlar ise bilsinler ki, ilâhiy adalet, aq ve uquqerine kelecek, basqıncılarğa lâyığınen muamele etecek bir qol mutlaqa bulunacaq ve er kes yapqan ameline köre cevabını verecektir.

Фото аватара

Автор: Редакция Avdet

Редакция AVDET