Ağır hastalıq ve murekkep ameliyattan soñ reanimatsiyağa tüşken Milliy areketimizniñ faal iştirakçisi, Ekinci ve Üçünci Milliy Qurultaylar mebusanı (delegatı), Milliy Meclisniñ sabıq azası Mamedi Abduraman oğlu Çobanovnıñ yüregi 6-avgustta, yarıgecege yaqın vaqıtta uruvdan toqtadı.
O zaman Aluşta, şimdi Suvdağ rayonına baqqan, dağlarnıñ içinde saqlanğan Arpat köyünde 1944 senesi doğğan Mamedi üç aftalıq çağında, sovet-stalin rejimi onıñ sabiy boynuna, cümle vatandaşları sırasında, aqılğa sığmağan qabaatlar asıp, qorantası, köydeşleri ile Uralğa sürgün etti.
Büyükleşkence nice-nice telükelerden keçken yigit, közboyama fermanı sahte imkânlar açqanınen, 1968 senesi Qırımğa keldi, İslâm-Terek rayonınıñ Bayraç (bozma adı Juravki) köyünde toqtadı ve çoq vaqıt anda yaşadı. Milliy areketke gençliginden qoşulğan Mamedi ağa içün, endi Ana-Yurtta, milliy aqları oğrunda küreşniñ yañı, ömrüniñ soñunace devam etken deviri başlandı.
Qorquzuv, tintüv ve sorğularnıñ soñu olmağan devirniñ ilk yıllarındaki bu taqipler neticesinde, M. Çobanov, bir qaç kere yaqalanıp, apiske bıraqılğan edi. 1968 senesi o, üç yılğa, 1972 senesi bir yılğa, 1979 senesi kene üç yılğa azatlığından marum etilgen edi.
İşte, şovinist akimiyeti – KGB, prokuratura, milis hadimleri, qadılar qolunen – Mamedi ağanıñ vatandaşlarından imza toplamaq, vesiqalarnı Moskvağa alıp barmaq, çet-el jurnalistlerinen körüşip, halqımıznıñ vaziyeti aqqında aqiqatnı söylemek kibi ve diger, adalet tiklenilmesi oğrundaki cesür faaliyetine böyle «qıymet kesip» keldi.
1991 senesi o, Qırımtatar Milliy Qurultayınıñ Ekinci çağıruvı azırlığında faal iştirak etti, onıñ mebusanı oldı. 1996 senesi Üçünci Qurultayğa da saylanıldı.
Qırım milliy davasında Mamedi ağa özüni qorqubilmez, adaletperver, halqsever, alçaqgöñülli, ğayet merametli, bunıñnen beraber öz ömüriy ve insaniy printsiplerinde qattı turğan cemaatçı edi ve öyle de hatıramızda yaşaycaq.
Mamedi ağa Çobanov vefat etkeni munasebetinen onıñ qorantasına: ömür arqadaşı Suriye hanımğa, oğulları Rustem, Nuri ve Mustafağa, bunıñnen beraber, diger yaqınları, aqrabalarına teren taziye bildirip, tükenmez sabır ve baş sağlığı tileymiz.
Merhum Allanıñ rahmetinde bulunsın.
Qırımtatar Milliy Мeсlisi ve bir guruh Мilliy Qurultay mebusanları.
