Qırımtatar yazıcısı, publitsisti Aydın Şemi-zade vefat etti

18.10.202013:18

Zemaneviy publitsist, fizik-matematikiy ilimler doktorı, qırımtatar edebiyatı klassiginiñ oğlu Aydın Şemi-zade Moskvada ayatınıñ 88-inci yılında vefat etti.

Yazıcınıñ ölümü Facebookta oğlu Abduraman tarafından bildirildi.

Ölüm sebebi koronavirus infektsiyanıñ müşkülleşmesidir.

Aydın Şemi-zade, “İnsan taqdirleriniñ yipleri” (“Нити судеб человеческих”) (“Mavı mustanglar” (“Голубые мустанги”), “Qırmızı künesuv” (“Красная ртуть”), “Altın müür” (“Золотая печать”)) trilogiyası, şiir ve ikaye cıyıntıqlarınıñ müellifidir. “Açıq Avrasiya” (2019) edebiyat yarışınıñ laureatıdır.

Yazıcı soñuna qadar çalışmağa, ders bermege, faal olaraq Facebook saifesini alıp barmağa devam etti. “Kanjal cenki” mevzusına bağışlanğan soñ yazısı, içtimaiy ağda 6 oktâbr künü yayınlandı.

Aydın Şemi-zade, 1933 senesi 1 sentâbr künü  Aqmescitte, yazıcı Eşref Şemi-zade ve ressam Sayde Bodaninskayanıñ ailesinde doğdı. Ailesinen beraber 1944 senesi Özbekistanğa sürgün etildi.

1953 senesi Yangiyül şeerindeki orta mektepni, 1958 yılı Orta Asiya Devlet Üniversitetiniñ fizik-matematikiy fakültetini bitirdi. Taşkent Tibbiy institutında, OADU (Orta Asiya Devlet Universitetiniñ) fizika fakultetinde çalıştı. Kâinat nurları fizikası ve küneş fizikası ile oğraştı.

1968-den berli Moskvada yaşadı ve çalıştı, daima Qırımğa kelip, Eski Qırımda qaldı.

Aydın Şemi-zadeniñ bir çoq yazısı “Avdet” gazetasında da yayınlandı. Bizim muarririyetimiz yazıcınıñ yaqınlarına, em de bütün qırımtatar halqına baş sağlığını tiley. Allah rahmet eylesin!

Author: Редакция Avdet

Avdet gazetası