Rustem Eminov

22.10.202019:47

Rustem Eminov, Taşkent vilâyetiniñ Parkent köyünde 13 aprel 1950 senesi doğdı. Eminovlarnıñ büyük ailesi mında, 1944 yılnıñ mayıs ayında sürgün etilgen soñra tüşti. 1953 senesi qoranta Taşkent şeerine köçti.

Ressam, Nizami adında Taşkent devlet pedagogik institutnıñ bediiy grafik bölügini bitirdi (1973). 1988-1999 seneleri arasında Taşkent devlet pedagogik üniversitetinde resim sanatı kafedrasında üyken oca olaraq çalıştı. 1999-2004 seneleri arasında – Benkov adında Taşkent bediiy oquv yurtunda ve Hocayev adında Cumhuriyet dizayn-oquv yurtında yüksek kategoriya ocası olaraq çalıştı.

Rustem Eminov, 1975 senesinden başlap, Özbekistanda ve çetelde 80-den ziyade bediiy sergilerinde iştirak etti. 1990 yılında Qırımda teşkil etilgen birinci qırımtatar ressamlar sergisiniñ iştirakçisi oldı. 1993 senesi, Ukraina medeniyet Nazirliginiñ davetinen, Kiyevde qırımtatar edebiyat ve sanat dekadasında iştirak etti. 1988 yılından başlap SSCB ressamlar birliginiñ azası, 1992 yılından başlap ise Özbekistan Cumhuriyeti Sanat Akademiya esnasında ressamlar icatkâr birliginiñ azası olğandır. 2005 senesinden berli Ukraina Ressamlar Milliy birliginiñ azasıdır. 2007 senesi Rustem Eminov Qırım Muhtar Cumhuriyetiniñ Yuqarı Rada mükâfatı laureatı oldı.

Rustem Eminovnıñ eserleri Devlet sanat müzey toplamlarına ve Taşkent bediiy sergi ve panoramaları müdirliginde, Aqmescitteki qırımtatar medeniy-tarihiy miras toplamlarına, Bağçasaraydaki İ. Gasprinskiy adında Müzey-evine kirsetilgen, ABŞ, İsrail, Malayziya, Cenüp Koreya, Avstraliya, Türkiye kollektsionerler tarafından satın alınğandır.

Author: Редакция Avdet

Avdet gazetası