Aqmescitte Amet-Han Sultan eykelininıñ açılış merasimi keçti

26.10.202022:55

25 oktâbr künü, Aqmescitte Sovet Birliginiñ as pilotı, eki defa qaramanı Amet-Han Sultannıñ doğğannıñ 100-ünci yıllığını añmaq içün eykelniñ açılış merasimi kerçekleşti.

Eykel Pionerskiy aralığı ile şeer merkezindeki Kirova Caddesi arasında yer alğan bir şeer bağçasında yerleştirildi.

Bu eykel, sabıq Sovet Birligi topraqlarında, efsaneviy pilotnıñ cenkâver mukâfatlarlı arbiy urbalarınen, tam boy olaraq tasvir etilgen yekâne eykel oldı. Onıñ arqasında, qaramannıñ ve cenkten soñra tecribe pilotınıñ yararlıqlarını köstergen granit levhalar yarım daire şeklinde yerleştirildi.

Hatırlatayıq, Amet-Han Sultannıñ eykeli Ayder Aliyev eykelci tarafından azırlanğan leyhağa köre yapıldı. Eykelniñ quruv yeri bir çoq qırımtatarda memnüniyetsizlikni doğurdı, olar efsaneviy pilotnıñ eykelini merkezde aynı adnı taşığan meydanda körmege istey ediler.

Amet-Han Sultan  1920 senesi oktâbr 25 künü Alupkada doğdı. Babası – lak (Dağıstanda Tsovkra-1 adlı avulından), anası – qırımtatar. Ana-babasına köre Amet-Han Sultannı em dağıstanlılar em de qırımtatarlar  öz milliy qaramanı olaraq qabul eteler. Amet-Han Sultan öz başına 30 ve qruppada 19 duşman uçağını urıp tüşürdi. O, 603 arbiy uçuşını yaptı, 150 ava cenkinde iştirak etti. Amet-Han Sultan, Tu-16 uçqan laboratoriyasında sınav uçuşını yapqanda öldi. Mosvadaki Novodeviçye mezarlığında defin etildi. Amet-Han Sultan Frenkistannıñ fahriy pilotı, Yaroslavl, Melitopol, Alupka şeerleriniñ ve Qırım Muhtar Cumhuriyetiniñ fahriy vatandaşıdır.

Author: Редакция Avdet

Avdet gazetası