Cürçi (Pervomay) rayonınıñ cemaatı çoq sezerli coyuqqa oğradı. Qorantasınen beraber Vatanğa ta 1968 senesi iyün ayında avdet olğan ve başta Acı-Atman (Rovnoye), soñra Aybar (Voykovo) köyünde yaşağan Milliy areketimizniñ faal iştirakçisi ve itibarlı insan Zulkefer Mustafa oğlu Taif 25 oktâbrde vefat etti.
Zulkefer ağa 1937 senesi 10-mayısta Üsküt köyünde doğdı. Deşetli sürgünlik yıllarına rastkelgen balalığı, ösmürligi Samarqand vilâyetiniñ Bulunğur rayon merkezinde keçti. Mında o, qurucılıqta çalışıp, teşebbüsçi guruhınıñ azası oldı ve, bunıñnen, Milliy areketimizge qoşuldı. Diger cemaatçılar sırasında avdet oğrunda çeşit vazifeler becerdi.
Bu aqta o, neşirlerimizniñ birisine: «Bu işnen oğraşqan insanlar, yüreklerinde Vatanğa sıñırsız sevgi tolu olıp, bunıñ esasında adaletke irişmekte ediler», dep söylegen edi.
Bir qaç vaqıt Zulkefer Aqqurğanda, Seitmemet Tairovnıñ qolunda çalıştı. Onıñ evinde ötkerilgen Qırım meselesine bağışlanğan toplaşuvlarda iştirak etti. Milliy areketteki işleri içün eki kere yaqalanğan edi, amma Seitmemet ağa oña çıqmağa yardımda bulundı em de, «verbovka» imkânı peyda olğanda, oña Qırımğa böyle şekilde avdet olayatqan bir qaç qoranta sırasına qoşulmağa qoltuttı.
Köçüv resmiy tarzda, közboyama maqsatnen olsa da, o vatandaşlarımız, şu cümleden, Zulkefer ağanıñ qorantası, başından nice-nice aşalav, qorquzuv, taqipler, aqsızlıqlar keçirdiler. Amma olar ar-namus ve degerliklerini saqlap, öz halqına doğmuş Qırımda tayanç oldılar, milliy arekette çeşit şekilde iştirakilerini devam ettiler.
Kütleviy avdet ve Vatan davası vatanda yañı küç alğan soñ, Zulkefer ağa çette turmadı, milliy ve insan aqlarımıznı tiklemek oğrunda ötkerilgen aktsiyalarğa qoşulıp keldi, cemaatnen beraber oldı, öz tecribesini, iradesini ve itibarını halqımıznıñ menfaatına işlettirdi.
Sadıq ömür arqadaşı Sulbiye hanım ile olar üç evlât östürdiler, yedi torun ve on bir torunçeniñ bahtlı qartbaba ve bitası oldılar.
Alicenap ve milletsever insan Zulkefer Mustafa oğlu Taif bu faniy dünyanı terk etkeni munasebetinen onıñ büyük qorantasına ve cümle yaqınlarına teren taziye bildiremiz, sabırlar ve baş sağlığı tileymiz, Alla rahmet eylesin, deymiz.
Altıncı Milliy Qurultay mebusanlarınıñ bir guruhı
Foto: Avdet
