Taziye / Rasim Nafe Bekir

01.11.202015:21

Aqmescitte, Bor-Çoqraq qasabasında otuz yıl evelsi ğayrıdan tamır atıp, diger semetdeşleri kibi, öz ellerinen ev qurıp yaşağan belli yerli cemaatçı Rasim Nafe oğlu Bekir vefat etti.

Bundan evel çoq sebeplerge bola yollar arasında qalğan Rasim ağa, 1994 senesi Vatanına temelli qaytıp, bütün öz tecibesi, aqıl-idraqı, küç-taqatını yaşağan qasabasınıñ abadan, güzel, zemaneviy olmasına bağışlay.

O, mında, 2002-2012 seneleri öz-özüni idare etken yerli milliy qurumnıñ yolbaşçısı, 2006-2010 ss. Aqmescit Merkeziy rayonınıñ deputatı, Ekinci (1991-1996) ve Dörtünci-Beşinci (2002-2013) Milliy Qurultay mebusanı olıp saylana. Cemaat işlerine faal yanaşıp, qasabağa suv, gaz, telefon ağları kirsetilmesine, yollar töşelmesine salmaqlı issesini qoştı.

Rasim Bekir 1939 senesi 1-sentâbrde Baydar köyünde (o zamanı Balıqlava rayonı) doğdı. Kiçik bala çağında, sürgünlik faciası neticesinde Özbekistanğa tüşti. Biñ zorluqlarnı yeñip, aliy tasilli oldı (1962 s., Taşkent politehnika institutı). “Üzbekselmaş”ta çalıştı. 1970 s. başlap Taşkent Köy hocalığı institutında ocalıq yaptı. Dissertatsiya qorçalap, tehnika ilimleri namzeti, dotsent, bu aliy oquv yurtta kafedra müdiri oldı.

Qırımğa qaytqan ve biraz yerleşken soñ, 1995 senesinden Qırım müendislik ve pedagogika universitetinde çalışa başladı ve, şu cümleden, eki kere – sekiz yıl – kafedra müdiri vazifesini eda etip, çerik asır emegini oña bağışladı.

Rasim ağa ilk sefer ve soñra da, çoq yıllar devamında, Baydar köydeşleriniñ körüşüvlerini teşebbüsçi ve teşkilâtçılarından biri edi. O, onı bilgen insanlarnıñ hatırasında mulâyim, külerüzlü, alçaqgöñülli, qonuşmağa bilgen, yorğunlıqnı tanımağan, merametli ve sadıq qoranta başı, bunıñnen beraber, vatanperver, milletsever insan olaraq qalacaqtır.

Rasim Nafe oğlu vefat etkeni munasebetinen onıñ ömür arqadaşı Gülnar hanımğa ve olar beraber östürgen üç evlâdına em de torunlarına teren taziye bildiremiz. Cümle soy-aqrabalarına sabır ve baş sağlığı tileymiz.

Alla rahmet eylesin.

Milliy Qurultay mebusanlarınıñ bir ğuruhı, Bor-Çoqraq qasaba cemaatçılığı, dostları, zenaatdaşları

Author: Редакция Avdet

Avdet gazetası