Alime Gusenova

14.11.202016:20

Er şey balalıqtan başlay. Balalıq ise – aileden. Ayat yolu, menimce, tek zenaatnıñ saylavı degil, aynı zamanda cemiyetteki yerini añlamaq, yaşayıştaki ilklerini, insanlarnen munasebetlerini saylamaqtır. Kelecekte kim olacağımı tasavvur etkenimde, balalı bir qoranta, merametli ve şefqatlı bir ömür arqadaş, meraqlı bir iş, sadıq dostlar körüne edi.

Kelecekteki zenaatnıñ saylavı pek müim bir qarardır, çünki iş bir insannıñ ayatınıñ emiyetli bir qısmını almaqta.

Kiçik yaşlardan berli menim ayatım icatkârlıqnen bağlı edi. Mektepte er vaqıt muarririyet kollegiyanıñ bir parçası edim, KVN yarışlarında iştirak ettim, çoq resim yaptım, ördim…

1995 senesi ailemnen Qırımğa qayttıq. Fotisala orta tasil mektebini bitirgen soñra, 1998 senesi QMPÜ-indeki, “maşına müendisliginde emek qorunması” bölügine kirdim. Diplomnı alğan soñra, zenaat alanında bir kün çalışmadım. Bağçasarayda qadın qıyafet tükânım bar edi. Ticaret maña meraqlı bir mevzu kibi körüne edi, mallarnıñ alma-satma protsessini ve müşterilernen munasebetni seve edim. Professional icadiy yolum 2009 senesi başladı. Bağçasaraydaki “Arslan” yaşlar merkezi mezunlarınıñ altın tikiş sergisini ziyaret etip, ekspozitsiyada taqdim etilgen nağış eserlerini pek begendim. Ve bundan soñ sanatnıñ bu çeşitini ögrenmege qarar aldım. Aynı kün istidatlı usta Zarema Mustafayeva reberliginde ananeviy nağış “mıqlama” kurslarına yazıldım. Daa soñra “tatar işleme” ve “telli” kibi tikiş tehnikalarını, meşur ve qabiliyetli bir nağışçıda, işniñ ustası Esma Osmanda ögrendim. Ananeviy tikiş çeşitlerini menimsegen soñ, qırımtatar örneklerini teren ögrenmege başladım. Ustazım kelecekteki qocam – ressam-çölmekçi Eldar Gusenov oldı. Dekorativ-ameliy sanatınen bağlı qıymetli malümatlarnı cümertçe paylaşqan, bu mevzuda çeşitli seminarlar ve master-klasslar ötkergen Mamut ağa Curlunı da qayd etmege kerek. Bu, sanatnı daa teren ögrenmek içün inanılmaz bir şekilde teşviq ete ve professional bediiy dereceni arttıra.

Böylece, eserlerimi yaratıp, sergilerde iştirak etmege başladım, Ukrainada nam qazanğan ressam, Rusiye ve Ukraina ressam birliginiñ azası Mamut Çurlu tarafından kuratorlıq yapılqan “Çatır-Dağ” icadiy birliginiñ azası oldım.  Dekorativ-ameliy sanatına bağışlanğan halqara festivaller ve tedbirlerine qatıldım. Böylece, 2010 senesi Lehistanda, Lüblin şeerinde “Folk Mikolaykalar” festivalinde iştirak ettim.

2013 yılnıñ iyün ayında, saylağanım Eldar Gusenovnen muabbet icatkâr ailemizni qurmağa qarar berdik. Aynı yıl küzde ömür arqadaşımnen beraber İstanbulda Qırımnı halqara ananeviy festivalinde taqdim ettik.

Aile ve icatkârlıq el elge ketti. 2014 senesi Edem oğlumuz dünyağa keldi. Dört yıl soñra Naile qızımız doğdı. Saip olğan er şey içün, sevgen işimnen oğraşa bilgenim içün Allağa soñsuz minnetdarım!

Eserlerimi esasen çetel memleketlerdeki şahsiy kollektsionerler tarafından satın alına.

İcatkârlıq menim içün – maneviyatımnıñ inkişafıdır ve bu daa soñra etraftakilerge tesir ete bile. Bu, güzellikni köre bilmekniñ, bir şeyniñ renkliligini, çoq taraflılığını is ete bilmekniñ bir usul ve becerigidir. Bir insanıñ samimiy ve duyğulı olaraq icat etken vaqıtları, neticeler mükemmel ola. İcatkârlıq – ayatnıñ müim bir parçasıdır. Er kesniñ özüni ifade etmesine, şahsiyetini urğulamasına ve elbette güzel dünyamıznı yañı duyğular ve islernen zenginleştirmege yardımcı olur.

Medeniyetimizniñ yañı taraflarını tedqiq etmege ve bu yönelişte inkişaf etmege devam etem. Halqta aytılğanı kibi: “Beşikten mezarğaca – ögren”. Qırımtatar özgün ve zengin medeniyetiniñ saqlanması ve yañıdan doğmasına öz issemi qoşa bilmem, meni pek quvandıra ve ilhamlandıra.

Author: Редакция Avdet

Avdet gazetası