Svetlana hanım Çervonnaya/Taziye

18.11.202019:11

Poloniya Cumhuriyetiniñ Torun şeerinden kederli haber keldi: soñki yılları mında yaşağan ve öz salmaqlı tetqiqat işlerini devam etken, halqımıznıñ 30-yıllıq samimiy dostu, sanatşınaslıq doktorı (1990), professor Svetlana Mihaylovna Çervonnaya 84 yaşında vefat etti.

İnternette onıñ aqqında tavsilâtlıca malümat tapmağa, deyerli, mümkün degil (atta Vikipediyada – sükünet). Amma onıñ keçingeni munasebetinen sabıq Sovetler birliginiñ bir sıra milliy cumhuriyet – mustaqil devlet ve ülkelerde onlarnen nekrologlar yazılacağı, taziye ve teessüfler bildirilecegine şübe yoq.

S. Çervonnaya daa 1970-nci seneleri İdil boyunıñ asıl halqı – tatarlarnıñ sanatınen oğraşıp, bu mevzuda namzetlik dissertatsiya qorçaladı ve emiyetli maqaleler, kitap çıqardı. Olarğa müsbet qıymet kesilgeniniñ neticesinde Svetlana hanımğa daa 1982 senesi Tatarstanda hızmet köstergen sanat erbabı unvanınıñ saibesi oldı.

Bunıñnen beraber çeşit yıllarda oña Tiflis ve Qaraçay-Çerkes devlet universitetleriniñ fahriy doktorı saylanılğanı aqqında diplomlar taqdim etildi. O, Baltika boyu cumhuriyetleriniñ zemaneviy sanatınen oğraşıp, olarnıñ ögrenilmesine de öz sezerli issesini qoştı.

S. Çervonnaya 1936 senesi Moskvada doğdı, mında Lomonosov adına universitetni bitirdi. Çoq vaqıt devamında Rusiye ilimleri Etnologiya ve antropologiya em de Medeniyetşınaslıq tetqiqat institutlarında çalıştı. Yetekçi ilmiy hadim, professor vazifelerini eda etti. Bediiy tenqitçilik Akamemiyasınıñ aqiqiy azası saylanıldı. 20 kitap ve 800-den ziyade maqalelerniñ müellifidir.

Svetlana hanımnı halqımıznen bağlağan bir sıra mündericeli neşirleri oldı. Olarnıñ arasında dört tomluq “Krımskotatarskoye natsionalnoye dvijeniye” (zenaatdaşı M. Guboglonen müellifdeşlikte, 1991-1994 ss.), “İskusstvo tatarskogo Krıma” (1995), bir sıra teren maqaleler bar. O, Milliy Qurultaymıznıñ çoq sessiyalarında musafir oldı. 2014 s. vaqialarına bağışlap, şu senesi “Qara baar” risalesini çıqardı. Soñki vaqıtlarda islâm dunyasınıñ mimarcılığınen, hususan, minareler sanat adisesi olaraq mevzusınen oğraştı.

30 yıldan ziyade evelsi Qırım milliy meselenen meraqlanıp, halqımıznıñ vaziyetine göñüldeşlik bildirilgen alda, belli derecede entsiklopedik malümat toplamaq, ilk sefer, 1950-nci seneleri ortalarından başlap, Milliy areketimizniñ tafsilâtlı hronologiyanı azırlamaq, keçmişteki vaqialarğa, umumen alğanda, doğru, adaletli ve, aynı zamanda, ilmiy seviyede qıymet kesmek – bularnıñ episi dostumıznıñ istidatlıcasına fikir yürsetken ve semereli, neticeli çalışmağa bilgen qollarından keldi. Sağ olsun!

Svetlana Çervonnaya vefat etkeni munasebetinen onıñ yaqınlarına teren taziye bildiremiz. Yatqan yeri puf olsun!

Milliy Qurultay mebusanları ve Milliy areketimiz iştirakçileriniñ bir guruhı.

Author: Редакция Avdet

Avdet gazetası