Mende tek sen barsıñ, milletim …

02.03.202113:07

Devletler, akimiyetler kele ve kete; zamanlar deñişe; etrafta yañğırağan tiller ve lehçelerniñ yerine başqaları kele, lâkin, bundan seyyare dönümi yavaşlamay, küneş ve yıldızlar sönmey, vaqıt toqtamay…

Nice-nice ağır qara künler kelip-ketti halqımnıñ başından…

Tilimizni yoq etmege tırışqanlar, milletimizniñ eñ acayip insanlarnı apishanelerge qapatqanlar, qurşunğa oğratqanlar, halqımıznı vatan toprağından sürgün etkenler qaydalar şimdi?! Topraq oldı… kül oldı… ayağımıznıñ tübündeki toz oldılar… Halqım ise yaşay! Er şey keçer-toz olur…

Tek bu künlerde er birimiz sanki bir sınavdan keçemiz. Halqqa sadıqlıq, vatanperverlik, cesürlik sınavından… Onıñ içün, “bratişkalar” çette qalsın (qardaş olmağanımız öyle de körüne) ve olarnıñ yerini milliy añlam, milliy ğurur alsın. Biri-birimizge qol tutayıq, can ağırtuvlar, boş davalar keçmişte olsun. Qomşunıñ kapusına kelgen belânı özüniñki dep sanayıq. Er bir insanımızğa diqqat eteyik.

Quvetimiz birlikte ve biri-birimizge köstergen ürmettedir. Çetten kelip iç kimse suallerimizge cevap bermez, meselelerimizni çezmez, duyğularımıznı añlamaz. Tek özümiz.

Mende tek sen barsıñ, milletim …

Er şey keçer: devletler, akimiyetler, qanunlar… Vatanımız qalır. Biz qalırmız… ve iç bir şeyni unutmamız.

Seyare KÖKÇE

Author: Редакция Avdet

Avdet gazetası