Elvida, Lenur ağa Mecit

16.04.20210:02

Çerik asırdan berli Aqmescit rayonınıñ Yañı-Sarabuz qasabasında yaşağan faal cemaatçı, 2000-nci seneleri yerli milliy idare qurumına reislik yapqan Lenur Suleyman oğlu Mecit 84 yaşında vefat etti.

Lenur ağa 1937 s. iyülde Bağçasarayda doğdı. Qorantası Hansaraynıñ artında yerleşken poşta azbarındaki evçikte yaşadı. Babası rayon maliye bölüginde, anası Zeyneb hanım kitaphanede çalışa ediler.
1944 senesi 18-mayıs facialı afatında Mecitovlar Taşkent vilâyetiniñ Vrevskaya stantsiyasına tüşeler. Yaşı yedige yaqınlaşqan Lenurnıñ hatırasında o künlerniñ deşeti umumiy tarzda saqlanıp, yıllar keçken soñ yazılarında nesiller içün qayd etilip qaldı.

Mektepte yahşı tasil alıp ve temelli azırlanıp, Lenur Kiyev şeerinde Grajdan ava flotu institutına (şimdi Aviatsiya milliy universiteti) oqumağa kire ve 1963 senesiniñ başında onı bitire. Uçaqlar ve olarnıñ motorları boyunca müendis-mehanik zenaatını menimsey.

Taşkent uçaqlar limanında çalışa. Amma anda milliy mensüpligi sebebinden bir davağa oğrap, o işten boşay. 1968 s. başlap, 28 yıl devamında, vilâyette bağça ve yüzümcilik hocalıqlarnı tehnikanen teminlegen büyük trestte, iş havsızlığı boyunca üyken müendisten başlap, birazdan mehanikleştirüv bölüginiñ müdiri vazifesini eda ete.

Evli-barqlı olıp, Lenur ağa Taşkent (Küylük-Sergili) sıñırındaki “Hanabad” sovhozında yaşay. Mında da Milliy areket iştirakçileri saflarına qoşula. Şeer, vilâyet teşebbüsçiler guruhınıñ vazifelerini becere. Belli milliy erbap Reşat ağa Cemilnen bağ tuta.

Qırımğa avdet olğanınen, Lenur ağa Mecitov yaşağan qasabasındaki vatandaşlarımıznıñ cemaat ömüre faal şekilde qoşula. 2003-te yerli milliy idare qurumına reis, IV (2002) ve V (2007) Milliy Qurultayğa aza saylana. Bayağı bir vaqıt Aqmescit regional milliy qurumına aza olaraq kire.
Bütün bu cemaat vazifelerini becererik, cümle milliy tedbirlerde, siyasiy aktsiyalar – miting, piket, yürüşlerde faal iştirak ete. Bunıñnen beraber, yerli cemaatnıñ yetekçisi sıfatında qasabanı gazlaştırmaq, abanlaştırmaq, güzel cami qurmaq kibi işlerge öz salmaqlı issesini qoşa.
Lenur ağa oqmuşlı-bilgili, mulâyim, sıralı, alçaqgöñülli, külerüzli, milletperver bir insan edi ve onı yahşı tanığan dost-meslekdeşler hatırasında, yüreklerimizde öyle de yaşaycaq.

Lenur ağa Suleyman oğlu Mecit aramıznı terk etken eken, onıñ ömür arqadaşı Zeyneb hanımğa, evlâtları Emirsale, Ayder, Zarema, Niyar ve kiyev-kelinlerine, torunlarına em de cümle soy-aqrabalarına teren taziye bildiremiz. Episine sabırlar ve baş sağlığı tileymiz.
Alla rahmet eylesin.

Merkeziy Milliy qurum azaları, dostları, safdaşları, “Qırım” ve “Avdet” gazetiniñ muarriyeti

Author: Редакция Avdet

Avdet gazetası