Elvida, Remziye apte

16.04.20210:00

Keçken seneniñ dekabr ayında 94 yaşını qayd etken sanatımıznıñ eñ körümli erbaplarından biri Remziye apte Bakkal (Tarsinova) bir qaç kün evelsi, yani 7-aprelde, vefat etti.

O, Aqmescitte, meşur oyuncı ve oyunlar ustazı (baletmeyster) Üsein Bakkal (1897-1973) em de muzıkacı, pianino çalğıcısı Zore hanım İzmaylovanıñ qorantasında doğdı, buyudı. Daa mektep çağına yetmezden oyunlar bala studiyasına qatnamağa başladı ve soñra Aqmescit balet studiyasını bitirdi.

Remziye hanım endi zenaat sanağa çıqayatqanda amansız cenk başlandı. Daa üç yıl keçer – halqımıznı ölüm sıñırına bıraqqan deşetli sürgünlik oldı. Bakkallarnıñ qorantası Tacikistanğa tüşe.

1947-1960 seneleri, babası baş baletmeyster olğan Leninabad muzıkal-drama teatrinde çalışa. Oyuncı-solist olaraq başlay, soñra babasınıñ vazifesini devam ete. Baş baletmayster olaraq bir sıra klassik spektakllereye (“Leylâ ve Mecnun”, “Farhad ve Şirin”, “Kamol Huçandi” ve ilâhri) oyunlarnı sanalaştırdı.

1970-ncı seneleriniñ ekinci yarısında onda yañı imkânlar peyda ola ve onı keniş cemaatımız tanımağa başlay. Çünki mahsus davet ile efsaneviy “Haytarma”mız içün oyun programmalarını azırlay.

1989 senesi, niayet, Qırımğa avdet ola ve öz medeniy faaliyetini devam ete. Qırımtatar dramteatri, “Qırım” folklor ansambli içün oyunlarnı sanalaştıra.

1992-2016 seneleri – Kezlevde yerleşken ve devlet filarmoniyanıñ yerli bölügi yanında faaliyet köstergen “Haytarma” ansambliniñ bediy reberi ve baş baletmeystri vazifelerinde çalıştı. Daa yaqında “Bağçasaray-Hansaray” vokal-horeografik kompozitsiyanı sanalaştırıp, çoqtan-çoq seyircilerniñ alğış ve elçırpmalarını qazandı.

Remziye hanım milliy oyun sanatımıznıñ inkişafına büyük isse qoştı. Em de aqiqiy ustaz edi – özünden soñ yüzlernen istidatlı talebelerni qaldırdı. O, 2018 s. çıqqan “Ömür boyu oyun ile” (“S tantsem po jizni”) kitabınıñ müellifidir.

Remziye Üsein qızı Tarsinova (Bakkal) vefat etkeni munasebetinen onıñ bala-torunlarına, cümle yaqınlarına teren taziye bildirip, sabırlar ve baş sağlığı tileymiz.

Merhume Allanıñ rahmetinde olsun.

Milliy Qurultay mebuslarınıñ ve cemaatçılarnıñ bir guruhı, “Qırım” ve “Avdet” gazetiniñ muarriyeti

Foto: Zair AKADIROV

Author: Редакция Avdet

Avdet gazetası