Dereköydeki (Yalta) medrese ocaları ve talebeleri. XX asırnıñ başı.
«İstok» cemiyet teşkilâtınıñ arhivinden.
Eskiden, qırımtatar mekteplerinde, musulmanlar içün muqaddes Ramazan ayında, oqutma grafigi deñişe edi. Meselâ, böyle 1893 senesi Aqmescit tatar ocalar mektebinde edi (balalar mında yalıñız oqumay, aynı zamanda yaşay ediler).
Saba saat 6 yerine, talebelerniñ uyanması saat 8:00 keçirile edi. Dersler sınıflarda 9:00-dan 14:30-ğa qadar devam ete edi, zenaat dersleri (belli ki, ağır işnen bağlı) keçirilmey edi. Saat 16:00-dan 19:00-ğa qadar talebelerniñ yuqlamasına izin berile edi.
Küneş batmasından soñra talebeler iftar yapa ediler. Olarğa «adettekiden biraz daa bol» bir aş ve çay berile edi. Aşağan soñra, nezaretçilerniñ refaqatında balalar teravih namazını qılmaq içün mektepke yaqın camige bara ediler.
Talebeler camiden qaytqan soñ, aqşam saat 11-den gece saat ekige qadar qısqa teneffüslernen ders yapa ediler. Soñra olarğa aş berile edi. Gece saat üçten saba sekizge qadar talebeler raatlana edi.
Ramazan qış mevsimine rastkelgende, mektepteki yaşayış tarzı aman-aman deñişmey – dersler, olarğa ayırılğan vaqıtta başlay ve bite edi. Talebeler aqşam namazından evel ve soñra ders yapa ediler. Gece olarğa aş berile edi ve sabanıñ erte saatlarında (tañdan evel) talebeler çay içe ediler.
Qırım etnografı Dmitriy PROHOROVnıñ materialları üzerine
