Naciye Bekirova “Vetan ve Beftan”

31.05.202115:40
Sıñırımıznı yıqıp keldi
bu yırtıcı nemseler.
Tuz-ötmeknen qarşıladı
Vlasov ve benderler.

Keñ adımnen yürüp keldi
Ukraina yolunen.
Közlerini qan qaplağan,
zıncırlanğan boynunen.

Ateş septi Qırımğa o,
urus-tatar baqmadı.
Ateşlerde tiri yaqtı,
lâin neler yapmadı.

Bala-çağa ızğıştılar-
kimden imdat qıdırsın:
baba ketti vetan içün,
kimge alını bildirsin.

Qaytıp keldi bizimkiler.
Oğradıq biz beftanğa –
“satqınsıñız” dep, lânet ayttı
marum qalğan halqlarğa.

Beftan sözünen tatar halqnıñ
fırsatını aldılar.
18 may maşer künü
vagonlarğa saldılar.

Şaşmaladı, şaştı halqlar
böyle büyük beftandan.
Baqtırmadı qapımızdan –
quvıp çıqtı vetandan.

Sürgün etti ömürlik bizni,
aqlı-aqsız demedi.
Süreklenip öldi halqlar,
çubün qadar körmedi.

Ey ağalar, böylemi edi
Qırım halqınıñ yazısı?
Ğurbet eller toprağında
ölüp bitti yarısı.

Nice türlü künler kördik,
unutulmaz acısı.
Öksüz qalğan sabiylerniñ
destan oldı bazısı.

Hatırlasam – bağrım yana
ölgenlerniñ sözünden.
Ciger qanı közyaş olıp,
aqtı halqnıñ közünden.

Az oldımı aqsız yerde,
vetan sattıñ degenler.
Aq cigerden “Ah” çektiler
ğurbet elde yürgenler.

Mañlayını ter qaplağan,
qıymay canıñ bermege,
asret olıp ölgenler çoq
Ana yurtını körmege.

Taş-toprağı bekley bizni
adı Güzel vetanım.
Ölsem eger, qabristanım
Qırım olsun mekânım.

Ey, Allahım, yıqılmasın
şu Qırımnıñ diregi.
Çoq horluq çekti tatarlar,
dert biyledi yüregi.

Şimdi ise tatar halqı
Vetan talap etmekte,
derdine derman qıdırğanlar,
Kavkaz betke köçmekte.

Qısmet olsun seyran etmek
Qara deñiz dalğasını.
Qısmet olsun aşamaqlar
şu Qırımnın almasını.

Qoqlar edim toya-toya
şu Qırımnıñ gülüni,
mor melevşe, erılğanlar,
mis qoquğan zümbülni.

Vetan demek öz evimiz.
Bunı er kes bilmeli.
Vetan peşinde yürgenlerge
epimiz yardım etmeli.

Bunı yazğan cail apay
bir işçiniñ qadını,
vetanına asret olğan,
soramañız adını.

1966 yıl. Nijnâya Bakanka. Krasnodarskiy kray

Author: Редакция Avdet

Avdet gazetası