Qırımtatarlarnı, qaraylarnı ve qırımçaqlarnı tamır halqları olaraq tanıdılar

03.07.202118:23

Ukrainanıñ Yuqarı Şurası, esas olaraq ve umumen Ukraina tamır halqları qanun leyhası içün rey berdi. “Qabul olması” içün 325 mebus çıqışta bulundı.
Ukrainanıñ, Qırım yarımadasınıñ topraqlarında şekillengen tamır halqları – qırımtatarlar, qaraylar ve qırımçaqlardır.

Şura saytında bildirilgeni kibi, №5506 qanun leyhası Ukrainanıñ tamır halqlarınıñ uquqiy statusını belgiley ve “bütün insan aqlar ve halqara aq-uquq normalarına köre belgilengen, ayrıca da Anayasa ve Ukraina qanunlarında ihtiyatlı, Ukraina tamır halqlarına ait şahıslarnıñ esas serbestlikke saip ola bilme uquqiy garantiyalarını tayinley”.

Qanun tarafından “Ukrainanıñ tamır halqları – Ukraina topraqlarında şekillengen, özgün til ve medeniyet taşıyıcısı, ananeviy, içtimaiy, medeniy ya da temsil organları olğan, Ukrainanıñ tamır halqı olaraq öz-özüni anlağan, bu devlet ealisi terkibinde etnik azlığını teşkil etken ve Ukraina tışında öz devlet teşkili olmağan avtohton etnik cemiyetidir” añlamnı tayinlendi.

Beyanatta: “Ukrainanıñ tamır halqları, Ukrainada öz muqadderatını tayin etme aqqına saip, Anayasa ve Ukraina qanunları çeçevelerinde siyasiy statusını belgiley, iqtisadiy, içtimaiy ve medeniy inkişafını serbest kerçekleştire”, – bildirile.

Qanun, Ukrainanıñ tamır halqları etnik mensüplik alâmetler ve özgün halqlar bütünliginiñ, medeniy degerliklerniñ marum etilmesine; er angi bir şekilde kompakt yaşama yerlerinden çıqarılma ya da mecburiy köçürilmesine; er angi bir şekilde mecburiy assimilâtsiya ya da mecburiy integratsiyağa; olarğa qarşı yönelgen ırq, etnik ya da diniy neftetiniñ doğurmasınıñ ya da rağbetlendirmesine yönelgen er angi areketlerine qarşı uquqiy qoruma garantiyalarını tayinley.

Ukrainanıñ tamır halqlarınıñ esas aqları arasında medeniy, tasil, til ve haber aqları, turğun inkişaf aqları garantiya etile, dep “KrımRealii” haber ete.



Author: Редакция Avdet

Avdet gazetası