Qurban (arab. قربان — qurban, qurban çalma) Allah rizası içün kesile. Qurban Onıñ (Allahnıñ) ediyeleri içün minnetdarlıq bildirmek ve Onıñ merametine yaqınlaşma sebebi olaraq hızmet ete.
Muhammed Peyğamberniñ hadislerinden birinde böyle aytılğan: «Qıtmır insanlardan eñ yaramayları – qurban çalmağa kerek olıp ta, bunı yapmağan soylarıdır».
Muhammed Peyğamber Qurban bayramda eki ayvan kese edi: birisini – özü, ekincisini ise — ümmeti içün.
Qurban çalma cemiyette içtimaiy münasebetlerni idare ete, imkânları olğan insanlar Allah, cemiyet ögünde belli bir mesüliyetlik taşığanlarını, yani böyle insanlarnıñ çareleri olsa, olarnı öz maddiy hoşnutlıq içün degil de, hayırğa işletmege kerekligini hatırlata.
Qurban çalma insanlar arasında farqlılıqlarnı sile, olarnı yaqınlaştıra, aralarında birlik ve dostluqnıñ pekitilmesine yardımcı ola, çünki bayram künleri inanğan insanlar tek yaqın insanlarına degil de, qalğanlarğa qarşı da yahşı işler yapmağa, sadaqa bermege ve qurban etinden dağıtmağa aşıqalar.
Böyleliknen, çalınğan qurban inanğan insannıñ maneviy temizlenmesi yanında belli bir vaqıtqa fuqare insanlarnıñ toymasını da temin ete.
