- Qurban bayramı, ya da arapça İd al-Adha, muqaddes yerlerde acılıq merasimi bitkeninen qayd etilip başlay. Acılar bir kün evelsi Arafat dağına köterileler, qurban çalınğan künü ise şeytanğa taş atıla ve Kaabe etrafı aylanıla.
- Qurban bayram, Oraza bayramdan 70 kün keçken soñ qayd etile, yani Hicriy taqvim bounca on ekinci aynıñ onuncı kününde.
- Bayram dört kün qayd etile.
- Bu bayramda esas olaraq Mina vadiysinde qurban çalmaqtır, amma acılıqqa barıp olamağanlar öz qurbanlarnı yaşağan yerlerinde de çala bilir.
- Qurban etilecek ayvan qusursız olmaq kerek. Yani topal olmaycaq, quyruğı yerinde olacaq, pek azğın olmaycaq ve ilȃhre. Qoy (qoçqar) 6 aydan yaş olmaycaq, eçki ve balaban ayvan eki yaşında olmaq kerek.
- Qurban etilgen ayvannıñ etini, şeriyat qanunlarına köre, üçke bölmek kerek: bir qısmı fuqarelerge berile, ekinci qısmından soy-aqraba, qomşularğa ziyafet yapıla ve üçünci qısmını da özüñe qaldırmağa mümkün. Ve böyleliknen fuqarelerge de yardım etile.
- Yaşalğan yeriñe baqmadan bayram künleri bütün musulmanlar bol-bol et aşaylar ve sofralarda, elbette çoq tatlılıqlar tolu ola.
- Qoy ve eçkini tek bir adam adından çalmağa mümkün, balaban ayvanlarnı ve develerni yedi adamdam qurban etmege mümkün.
- Peyğamberimiz Muhammed (sav), Qurban bayramını eñ büyük bayramlardan biri dey edi.
- Qurban bayramı bayram namazından başlay. Namazdan qaytqan soñ mezarlıqlarğa barılıp dualar oqula ve soñ qurbanlar çalına.
Foto: Rudem Şabadin
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.