Kiyevde, «Qırım platforması»nıñ birinci sammitinde iştirak etken 46 memleket ve halqara teşkilât, halqara qabul etilgen sıñırları içinde Ukrainanıñ topraq bütünligini yañıdan nezaret astına almaq içün 23 avgust künü ortaq beyanname imzaladılar. Sammitniñ iştirakçileri, Rusiye Qırım ve Aqyarnıñ qoşuluvını qanunlaştırıp olamaz, dep bildirdiler.
Beyannameniñ metni Ukraina Tışqı işler nazirliginiñ saytında yayınlandı.
Vesiqada: «İştirakçiler, halqara qabul etilgen sıñırları içinde Ukrainanıñ topraq bütünligini yañıdan nezaret astına almaq içün yönelgen kerek ortaq diplomatik küçlerni alğışlay, Ukrainanıñ suveren topraqlarınıñ ayırılımaz bir parçası olaraq Qırım Muhtar Cumhuriyeti ve Aqyar şeeri statusınıñ er angi deñişmesi tanılmay ve tanılmaycaq ve Rusiyeniñ vaqtınca işğalini qanunlaştırma ıntıluvları qabul etilmez olğanını qayd ete», – beyan etile.
Beyanname altına AQŞ, Kanada, Büyük Britaniya, Yaponiya, Avropa Birligi ve Avropa Birligi aza-ülkeleri ayrı-ayrı (Avstriya, Belçika, Bulğaristan, Macaristan, Almaniya, Yunanistan, Danimarka, İrlandiya, İspaniya, İtaliya, Qıbrız, Letoniya, Litvaniya, Lüksemburg, Malta, Felemenk, Poloniya, Portugaliya, Romaniya, Slovakiya, Slovaniya, Finlândiya, Frenkistan, Hırvatistan, Çehiya, İsveçiya, Estoniya), İslandiya, Norvegiya, İsveçre, Montenegro, Şimal Makedoniya, Arnavutlıq, Moldova, Gürcistan, Türkiye, Yañı Zelandiya ve Avstraliya ve ayrıca NATO, Avropa Şurası ve GUAM (Demokratiya ve iqtisadiy inkişaf teşkilâtı) kibi teşkilâtlar imza qoydı.
Sammit vaqtında, «Rusiyeniñ Qırım ve Aqyarnıñ vaqtınca işğaliniñ barışıq bir şekilde bitirilmesi»niñ mesleat ve koordinatsiya içün «Halqara Qırım platforması»nı teşkil etmege qarar alındı.
İştirakçiler Rusiyeni de «Qırım platforması»na qoşulmağa ve maqsatlarını paylaşmağa davet etti.
Sammitte, yarımadada insan aqlarınıñ ve serbestlikleriniñ bozulmasını, Qırımnıñ askerleştirilmesini, Keriç boğazı ve Azaq deñizinde serbest gemiler qatnamasınıñ mania etilmesini, Rusiye vatandaşlarınıñ Qırımğa köçmesini takbih ettiler.
