2-sentâbr aqşamında içtimaiy ağlarda kederli haber darqaldı: 32 yıldan berli Aqmestcitte yaşağan Milliy arekemizniñ eski ve faal iştirakçisi, ğayet mulâyim ve milletperver insan Şefiqa apte Konsulnıñ ağır hastalıq neticesinde yüregi uruvdan toqtadı. Bu seneniñ fevral ayında cemaatımıznıñ vekilleri onı, 84 yaşnı toldurğanı munasebetinen, hayırlağan ediler…
Şefiqa apte facialı qarsanbalardan bala, ösmür ve genç olaraq keçken nesilden olıp, ömürniñ sorumlarına öz qaviy iradesi, adaletsizlikke qarşı turmağa bilmesi, halqına olğan sıñırsız sevgisi ile çıqtı.
O, özüniñ bu ve diger, milletniñ eñ añlı ve ileri vekillerine has olğan çizgilerini, ömüriniñ soñunace numayış etip keldi. Belli ki, öyle cesür ve tarihımızda iz qaldırğan insanlarımız yaşayışınıñ ömür tarzı — milliy areket, maqsadı — halqımıznıñ Vatanğa qaytuvı ve cümle aqlarını, şu cümleden, milliy devletçiligimizniñ tiklenilüvi oldı.
Şefiqa Konsul (doğma soyadı İslâmova) 1937 senesi Kök-Közde doğdı. Böyle de ağır balalağını başta cenk, soñ sürgünlik tar-mar ettiler. O, Samarqand mektepleriniñ birisinde oqudı. Kitaphaneci zenaatını menimsedi ve öyle vazifede de çalıştı.1956 senesi o, birazdan soñ peyda olğan, çoq sayılı ve küçlü olğan Samarqand teşebbüsçiler guruhınıñ körümli iştirakçisi ve, atta,qaznadarı olğan Mustafa ağa Konsulnen qoranta qurdılar. Böyleliknen, Şefiqa apte 1960-ncı seneleriniñ başında Milliy areketimizge qoşulıp, Vatan davasında faal iştirak ete başladı. Ömür arqadaşınen beraber o, Qırım milliy meselesindeki vaziyet, deñişmeler ve yañılıqlar, Milliy areket çerçivesi ve ketişatında yapılğan işler, uydırılğan mahkemeler aqqında vesiqalarnı yazuv maşinkada bastırdı, çoqlaştırdı, yayındırdı. Para ve imzalar toplamaqta, toplaşuvlarnı ötkermekte, muracaat ve beyanatlar azırlanmaqta, Moskvağa vekillerni yollamaqta refiğı ve onıñ eñ yaqın safdaşlarına, Samarqand guruhnıñ yolbaşçılarına daima yardım etip turdı. Taqipler, tintüvler, KGB-ge çağırmaqlar, sorğular Konsullarnıñ qorantasını bükültirmedi, olar yollarından taypınmadılar. Aksine, yapqan işleri adaletli, aqlı olğanında ziyade emin olıp, ket-kete areketlerini keskinleştirdiler. Yahşı yırlağan, halq oyunlarını, folklorımıznı, urf-adetlerimizni, tedbirler alıp barıcılığını yahşı bilgen Şefiqa apte özünden yaşça olğan, yani ğurbette doğğan nesilniñ arasında sayğı-itibar qazanıp, o gençlerni de milliy medeniyetimizni ögrenmesine, milliy bayramlarnı qayd etilmesine kütleviy şekilde celp etti, olarğa bu saada öz bilgilerini aşladı.
1980 senesi Konsullar Qırımğa qaytalr ve mında yaşamağa tırışalar. Amma olarnıñ bu ıntıluvları akimiyet tarafından kestirildi. Neticede Mustafa ağa ve Şefiqa apte Krasnodar ülkesiniñ Abinsk şeerinde yerleştiler. Mında da olar kütleviy ve faal olğan yerli teşebbüsçiler guruhına koşulıp, belli insanlar olalar. Niayet, 1989 senesi Konsullar Qırımğa avdet olalar ve birazdan Aqmescitte yerleşeler. Bundan evel eki infarkt keçirgen Mustafa ağa 1993 senesi vefat ete. Milliy areketnen bir nefes alğan, halqınıñ ömüri ve menfaatınen yaşağan Şefiqa apte iç bir — olsun siyasiy, olsun medeniy — tedbirlerden çette qalmamağa tırıştı. Qurultaylarda musafir oldı. Milliy televizion programmalarında iştirak etip keldi. 2014 senesi başımızğa tüşken vaqialarnı o, keskin takbih etti. Bu aqta ATR telekanalınıñ yayınlarında defalarca çıqışlar yaptı, halqımıznı boysunmamağa, birlik-beraberlikte olmasına, ümüt beslemesine çağırdı.
Bir qaç sene evel ise, şu cümleden, Milliy areketimizge bağışlanğan onıñ «Dostlarım — menim yırlarım» adlı cıyıntığı dünya yüzüni kördi.
O, daima milliy devletçiligimiz tiklenmesini, halqımız sevimli Vatanında saip olmasını ve çeçeklenip yaşağanını arzu etken ve buña iç şübelenmey işanğan, küler yüzlü, yımşaq göñülli, mulâyim, aydın insan edi ve öyle de epimizniñ hatıramızda yaşaycaqtır.
Şefiqa apte Konsul vefat etkeni munasebetinen onıñ cümle yaqınlarına teren taziye bildiremiz ve baş sağlığı tileymiz.
Alla rahmet eylesin. Yatqan yeri cennet olsun.
Merkeziy Milliy qurum azaları, dostları, safdaşları, bir guruh Milliy Qurultay mebusları.
