Adliyeci Cemil Temişev «fevral 26» davasından çıqarıldı

16.03.201720:10

Aqmescit (Simferopol) Merkez rayon mahkemesi adliyeci Cemil Temişevni «fevral 26» davasından çıqardı.

Temişevniñ sözlerine köre, onıñ davadan çıqarıluvınıñ iç sebepleri yoq.

«Tünevin (mart 15-te, – Avdet) prokuror, evel Talât Yunusov ve Eskender Nebiyevniñ menfaatlarını temsil etkenim munasebetinen menim davadan çıqarılmam aqqında şefaat arizasını berdi, ve prokuror imaye etkenim kişilerniñ menfaatları farqlı olğanını saydı. Men bunı red etken edim, aytqan edim ki, imaye etkenim kişiler mitingge öz isteginen keldi ve olarğa kimse yolbaşçılıq etmedi. O yerde umumiy cinaiy bir plan yoq edi. Bunıñ içün narazılıq bildire edim. Maña bütün zenaatdaşlarım qol tuttı. Olar da bu davadan çıqaruvnıñ sebepsiz olğanını saydı», – dep ayta Temişev.

Avdetniñ evel bildirgenine köre, mart 15-te Aqmescit Merkez rayon mahkemesiniñ «fevral 26 işi» boyunca toplaşuvı çerçivesinde prokuror adliyeci Cemil Temişevniñ davadan çıqarılması aqqında şefaat arizasını berdi.

Fevral 27-de adliyeci Nikolay Polozov bildirdi ki, qırımtatar faali Ahtem Çiygoznıñ işi boyunca mahkemede bundan evel mahküm etilgen Eskender Nebiyev, Talât Yunusov ve Arsen Yunusovnıñ sorğuğa çağırılıması aqqında prokurornıñ şefaat arizası qanaatlendirildi. Sorğuğa çekilgen üç kişi yaqalanğan adamnıñ 2014 senesi fevral 26-da Qırım Yuqarı Şurası binası yanında keçirilgen miting vaqtındaki areketleri aqqında bir şey aytmadı, dep bildire «Qırım.Aqiqat».

İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET