Aliye Memetova yekâne devlet imtianı boyunca Qırımda eñ yüksek baa aldı

10.07.201713:09

Kezlev (Yevpatoriya) sakini, «İntegral» oquv-terbiye kompleksiniñ mezunı Aliye Memetova Qırımda himiya boyunca yekâne devlet imtianını berip yüz baa qazanğan yekâne mezun oldı.

Bu aqta «Yevpatoriya.TV» bildire.

Aliye Memetova Kezlevde yüz baa qazanğan yekâne mezun ola. Qırımda ise, bu sene onıñ kibi beş mezun oldı: Kefede (Feodosiya) informatika boyunca, Saq ve Krasnoperekopskta rus tili, bunen beraber, bir adam edebiyat boyunca yüz baa aldı.

Aliyeniñ sözlerine köre, böyle neticelerge yetmek içün, o, er kün üçer saat himiyanen oğraşa edi. O, emin ki, talimde böyle israr lâzimdir, çünki onıñ maqsadı, tip universitetine kirmek ve ekim olmaqtır.

«Bu imtiandan çoq siñirlendim. Çünki bir yıl devamında, ondan keçmesem, ne olur, dep tüşüne edim. Onıñ neticelerini de beklemek ağır edi, çünki endi bir şey yapıp olamazsıñ, tek bekleyceksiñ. Endi men bahtlım ve böyle güzel neticeden memnünim», – dep ayttı Aliye.

Mezunnıñ böyle muvafaqiyetine onıñ ana-babası da quvana, amma olar kiçik qızı yüksek baa alacağından şübelenmedi. Olarnıñ üç qızı oquv alâcıları ola. Aliyeniñ büyük tatası da mektepni medalnen bitirdi, endi cerrah olıp çalışa. Bunıñ içün, o, kiçik qız qardaşları içün nümüne olğan edi.

Aliye nasıl bir ekim olacaq, dep daa qarar almadı. Er alda, endokrinologiyanı saylaycaq, çünki bu saadan meraqlana, em de şeerde mütehassıslar yetmemezligi duyula.

İçtimaiy ağlarda FacebookVkontakteOdnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET