Aqmescit şeer yolbaşçısınıñ yañı muavini sabıq akem Nariman İsayev olacaq

17.01.20179:40

Yanvar 18-de Aqmescit memuriyeti yolbaşçısınıñ muavini vazifesine 40 yaşındaki Nariman İsayev tayinlenecek.

Bu aqta Qırım paytahtı şeer memuriyetiniñ matbuat hızmeti bildire.

Nariman İsayev Özbekistannıñ Taşkent vilâyetindeki Nijneçirçikskiy rayonında doğdı. Yaroslav Mudrıy adına Milliy uquq akademiyasını bitirdi. İşini Curçı rayonında başladı, o yedre 2002 senesine qadar Rayon adliye idaresiniñ Devlet hızmetiniñ yolbaşçısı edi. Bundan soñ, başta Aqmescitte Merkeziy rayon adliye idaresiniñ, soñra da Aqmescit şeer adliye idaresiniñ Devlet icra hızmetiniñ yolbaşçısı edi. 2006 senesi mütehassıs mahkemecilerni azırlav fakultetini bitirdi. Bir qaç yıl devlet hızmetinen oğraşmağan edi, «Femida plüs» Qırım adliye agentligi» müdiriniñ muavini ve «Uquq qoruyıcı konsalting gruppası» Qırım bölügi müdiriniñ muavini edi.

2010 senesi Aqmescit şeerinde Devlet bergi inspektsiyasınıñ uquq bölügi müdiriniñ muavini oldı. Bundan soñ üç yıl devamında «Arbitraj» birleşmesi yanında Qırım Muhtar Cumhuriyeti daima çalışqan akem mahkemesiniñ mahkemecisi edi. 2014-2015 seneleri daima çalışqan Yuqarı arbitraj akem mahkemesiniñ mahkemecisi olaraq çalıştı. 2015 senesi aprel ayından başlap Qırım Cumhuriyeti Devlet qurucılıq nezareti hızmetiniñ adliye idaresi müdiriniñ muavini – müdir vazifesini eda etken edi.

Bundan da ğayrı, Aqmescit memuriyetinde diger kadr deñişmeleri de beklenile. Böyleliknen, şimdiki vaqıtta memuriyet yolbaşçısınıñ birinci muavini vazifesinde bulunğan Sergey Krutsük muavin olacaq. Onıñ yerine ise, evel bu vazifeni eda etken Aleksandr Ovidiyenko tayinlenecek.

Avdetniñ bildirgenine köre, bundan evel Aqmescit memuriyeti yolbaşçısınıñ muavini Teyfuk Gafarov istifağa çıqarıldı.

Фото аватара

Автор: Редакция Avdet

Редакция AVDET