Bağçasaray rayonı ormanlarında eki bala coyuldı

10.06.201723:40

Tünevin «KRIM-SPAS» qazaiy-qurtarıcı taqımı Bağçasaray rayonındaki ormanlarda eki coyulğan balanı qıdırıp taptı.

Olarnıñ biri, 16 yaşındaki oğlan, ayaqmaşnanen Kermençik (Vısokoye) köyünden Ayırgül (Solneçnoselye) köyüne orman yolunen ketip, yolunı şaşırdı ve ormanda coyuldı. Qaranlıq ve şiddetli yağmur onı qıdırmağa keder etti. Lâkin, bir saat keçken soñ, oğlannıñ sesi eşitildi, saat 23:10-da ise, onı tapıp qurtardılar. Yahşı ki, oğlan tibbiy yardımğa muhtac olmadı. Onıñ sözlerine köre, o, evge ketip, yolunı qısqartacaq oldı, belli olmağan yolğa buruldı ve neticede coyuldı.

Aynı mesele boyunca Qırım qurtarıcılarına Moskvadan kelgen Sun Spirit festivaliniñ iştirakçisi da muracaat etti. O, ayttı ki, onıñ 6 yaşındaki balası coyuldı. Vaqia Bağçasaray rayonınıñ Zalanköy (Holmovka) köyünde yüz berdi. Bir saattan soñ bala tapıldı ve anasına qavuştırıldı. O da, tibbiy yardımğa muhtac olmadı.

Qırım fevqulade vaziyetler naziri Sergey Şahov hatırlata ki, ana-babalar balalarına diqqatlı davranmalı, olarnı qısqa müddetke bile közetüvsiz qaldırmamalı.

Avdetniñ evel bildirgenine köre, mart 4-te Qarasuvbazar (Belogorsk) rayonınıñ Köktaş (Sinekamenka) köyü yanında ormanda 3 yaşındaki Ablâkim Ablâkimov coyuldı. Oğlannı bütün köy sakinleri qıdıra edi, qıdıruvğa yarımadanıñ çeşit köşelerinden kelgen qırımtatarlar qoşuldı. Ablâkim tahminen 17 saat devamında ormanda bulundı, onı saba saat 5-te evinden bir qaç kilometr uzaqlığında taptılar. Bala Qarasuvbazar merkez rayon hastahanesine umumiy aşırı suvutma diagnozı ile ketirildi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET