Birleşken Milletler Teşkilâtında Qırımda insan aqları bozulması aqqında rezolütsiya tasdıqlandı

16.11.201612:15

Birleşken Milletler Teşkilâtı Baş assambleyasınıñ içtimaiy, gumanitar meseleler ve medeniyet meseleleri boyunca Üçünci komiteti Ukraina tarafından tizilgen Qırımda insan aqları aqqında rezolütsiya leyhasını qabul etti.

Ukrain missiyasınıñ saytında bildirilgen malümatqa binaen, vesiqanıñ qabul etilmesi içün 73 devlet, bu cümleden, AQŞ, Büyük Britaniya, Kanada ve Avropa birligi devletleri rey berdi. 23 devlet qarşı oldı, daa 76 devlet bitaraf oldı.

Vesiqada «insan aqları bozulması, Qırım sakinlerine qarşı ayırım tedbirleri ve ameliyatı», bu cümleden «qırımtatarlarğa, bunen beraber, ukrainlerge ve diger etnik ve diniy gruppalarğa ait olğan şahıslarğa qarşı», dep yaza TASS agentligi.

Bunen beraber, rezolütsiya leyhası Rusiyeni Qırımğa insan aqları saasını nezaret etken halqara missiyalarnıñ ve ükümetke ait olmağan uquq qoruyıcı teşkilâtlarnıñ «kerekli ve maniasız kirişni teminlemege» çağıra. Bundan da ğayrı, rezolütsiya, Qırımtatar Milliy Meclisiniñ ekstremistik teşkilâtı olaraq tanılması aqqında 2016 senesi aprel 26-da Qırım Yuqarı mahkemesi tarafından qabul etilgen qararnı «deral lâğu etilmesini» talap ete.

Endi vesiqa Birleşken Milletler Teşkilâtı Baş assambleyasınıñ baqılmasına teslim etilecek. Toplaşuv bu sene dekabr ayında keçirilecektir.

2016 senesi aprel 26-da Qırım Yuqarı mahkemesi Qırımtatar Milliy Meclisiniñ ekstremistik teşkilât olğanını tanıdı ve Rusiyede onıñ faaliyetini yasaq etti. Sentâbr 29-da Rusiye Yuqarı mahkemesi Meclisniñ yasaq etilmesi aqqında Qırım Yuqarı mahkemesiniñ qararını tasdıqladı.

Фото аватара

Автор: Редакция Avdet

Редакция AVDET