Bugün Aqmescitte Ali Asanov ve Mustafa Degermenci boyunca mahkeme keçirile

07.10.201612:22

Oktâbr 7-de Aqmescit Merkeziy rayon mahkemesinde «fevral 26» işi boyunca mahkeme toplaşuvı devam ete, bu iş boyunca Ali Asanov ve Mustafa Degermenci qabaatlana.

Tünevin Ali Asanovnıñ adliyecisi Edem Smedlâyev bildirdi ki, mahkemeci, Ali Asanov ve Mustafa Degermenciniñ apiste bulunma müddetiniñ uzattırılması aqqında prokurornıñ şefaatını baqmağa başladı, amma adliyeci Solodkov mahkemege ayttı ki, o, azırlıq toplaşuvınıñ keçirilmesi aqqında şefaat arizasını bergen edi, bundan soñ mahkemeci oktâbr 7-ge qadar teneffüs ilân etti.

Avdetniñ bildirgenine binaen, 2016 senesi iyül 20-de mahkeme «fevral 26» işini bölmek qararını aldı, Ali Asanov ve Mustafa Degermencini oktâbr 8-ge qadar apiste qaldırdı.

Hatırlatamız ki, Qırımnıñ İçki rayonındaki Ferngeym (Urojaynoye) köyü sakini Ali Asanov 2015 senesi aprel 17-de yaqalandı. Belli olğanına köre, Ali Asanov, dört balanıñ babası ola, olarnıñ eñ kiçigi, babası SİZO-da bulunğan vaqıt doğdı.

Mustafa Degermenci 2015 senesi mayıs 7-de yaqalandı.

Taqiqatnıñ noqta-i nazarına binaen, Ali Asanov ve Mustafa Degermenci 2014 senesi fevral 26-da Qırım parlamenti binası yanında keçirilgen miting neticesinde yüz bergen kütleviy nizamsızlıq istirakçileri oldı.

Фото аватара

Автор: Редакция Avdet

Редакция AVDET