Bugün, noyabr 10-da Canköy rayonındaki Çoqraqlı Şeyh Eli (Dneprovka) köyünde şahsiy evde yanğın yüz berdi, neticede bir insan zararlandı.
Bu aqta malümatnı Fevqulade vaziyetler nazirliginiñ Qırım baş idaresi matbuat hızmeti bildirdi.
Müessisede qayd etkenlerine köre, bir qatlı ev gece tahminen saat üçte yanıp başladı. Vaqia yüz bergen yerge yanğıncılar kelip, ateşni söndürip başladı. Bina içinde qurtarıcılar 36 yaşındaki ev saibini taptı.
Zararlanğan kişi tahliye etildi ve hastahanege ketirildi. 15 kvadrat metrni qaplap alğan ateş yarım saat içinde söndürildi. Ekspertler vaqia sebeplerini ögrene.
