Çubarovnıñ Qırımda 15 kün devamında maniasız bulunmağa imkânı olur, – adliyeci

16.05.201710:00

Qırımtatar faali Ahtem Çiygoznıñ adliyecisi Nikolay Polozovnıñ fikrince, Qırımtatar Milliy Meclisi (Rusiyede 26.04.2016 mahkeme qararınen yasaq etilgen) reisi, Ukraina halq deputatı Refat Çubarovnıñ Qırımda 15 kün devamında maniasız bulunmağa imkânı olur.

«Mesele şunda ki, 456-ci maddeniñ cinaiy-usul kodeksi boyunca, şaat ecnebiy memlekette bulunsa, mahkeme Adliye nazirligi vastasınen bu devletniñ uquq qoruyıcı organlarına muracaat ete bile ve şaatnıñ, onıñ dava ceryanında iştirak etmesi içün, ketirilmesini teminley bile. Bundan da ğayrı, şaatnıñ 15 kün devamında er türlü taqip etilüvinden immuniteti bar», – dep ayttı Polozov.

Bunen beraber, adliyeci qayd etti ki, Refat Çubarovnıñ sorğuğa çekilmesi rusiyeli adliye menfaatlarına kire.

«Çubarovnıñ sorğuğa çekilmesi rusiyeli adliye menfaatlarına kire. «O, fevral 26 vaqialarınıñ (2014 senesi fevral 26-da Qırım Yuqarı Radası binası yanında keçirilgen miting, – Avdet) esas iştirakçisi ola. Onı er bir zararlanğan şaat ayta: o, anda bulunğan edi, dep. O, kerçekten de, müim deliller ketire bile. Bunıñ içün, adliyege esaslanacaq olsaq, böyle şaatnı, kerçekten de, ketirmek ve diñlemek kerek», – dep Polozov «Qırım.Aqiqatqa» izaat berdi.

Qırım sabıq prokurorı, Rusiye Devlet Duması deputatı Natalya Poklonskaya ilân etti ki, o, Qırımda Refat Çubarovnı, yarımadağa kelse, şahsen qarşılamağa azır.

Qırım sabıq prokurorı, Rusiye Devlet Duması deputatı Natalya Poklonskaya ilân etti ki, o, Qırımda Qırımtatar Milliy Meclisi (Rusiyede 26.04.2016 mahkeme qararınen yasaq etilgen) reisi Refat Çubarovnı, yarımadağa kelse, şahsen qarşılamağa azır.

Avdetniñ evel bildirgenine köre, mayıs 15-te Refat Çubarov qırımtatar faali Ahtem Çiygoznıñ işi boyunca mahkemede sözde bulunmaq içün Qırımğa kelmege azır olğanını ilân etti. Çubarov oquğan beyanatında Qırım Yuqarı mahkemesiniñ toplaşuvına şaat olaraq çağıruvğa razılıq bere. O, vesiqanı Ahtem Çiygoznıñ adliyecisi Nikolay Polozovğa onıñ mayıs 19-da Kiyevge kelgende teslim etecek ola.

Ahtem Çiygoz 2014 senesi fevral 26-da Qırım Yuqarı Radası binası yanında mitingde iştirak etkeni içün 2015 senesi yanvar ayında yaqalandı. O vaqıt miting iştirakçilerine qarşı Rusiye tarafdarları olğan faaller, bu cümleden, «Russkoye Yedinstvo» firqasınıñ temsilcileri, çıqtı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET