Bugün, mart 14-te belli qırımtatar horeografı, Ukrainada nam qazanğan artist, Qırım halqları mukâfatınıñ laureatı, «Uçan-Su» ansambliniñ tesisçisi ve deñişmez reberi Ali Alimov 90 yıllığını qayd ete. Bu kün efsaneviy oyuncı ve ocanıñ ayatından meraqlı malümatlarnen tanış olmağa teklif etemiz. Avdet gazetasınıñ muarririyeti Ali ağa Alimovnı hayırlay ve oña daa çoq yıl devamında oyun içinde yaşamaqnı ve yüzlerce mühlis ve şegirtlerini quvandırmaqnı tiley.
- Sürgünlikniñ ilk seneleri 17 yaşındaki Ali Alimov Andijanda ayaqqapçı olıp çalışqan edi. O yerge anasınen beraber sürgün etildi. Bundan da ğayrı, o, şoför ve zavodda çeşit mahsulatnıñ modellerini yapqan işçi olaraq çalıştı.
- Sanağa Ali Alimovnı belli bestekâr Yaya Şerfedinov ketirdi. O vaqıt teatrde artsitler yapqan işleri içün aşayt mahsulatı talonlarını alğan edi, böyle etip, qorantalarını açlıqtan qurtara edi.
- Ali Alimov, Vatanğa qaytmağa imkânı olmağanı içün, 22 yıl devamında Odessada yaşadı, o yerde onıñ dayısı yaşağan edi. Qırımğa ilk imkân peyda olğanda qayttı.
- Sovet seneleri, qırımtatar medeniyeti tabu tübünde olğanda, Ali Alimov sanada qırımtatar oyunlarını sanalaştırmağa devam etken edi. O, Odessada birinci qırımtatar oyunını sanalaştırğanını hatırlay. Bu, «Çoban oyunı» edi, vilâyet komiteti reisi ondan bu nasıl oyun olğanını sorağanda, Ali bey «Dağ çobanlarınıñ oyunı» dep, böyleliknen kerek olmağan iddialarğa yol bermedi.
- 70 yıllıq icat yolunda Ali Alimov 2 biñden ziyade talebeni ögretti.
- Ali Alimov qayd ete ki, o, er angi qırımtatar kişi kibi, bostanda çalışmağa ve tahtalardan eşyalar yapmağa seve. Tınçlıq ve raatlıqtan onıñ aritmiyası peyda ola, lâkin, nasıldır iş yapmağa, oyunnen oğraşmağa tek başlasa ya da kezmege çıqsa, yüregi yahşı çalışıp başlay.
- Oğlu ile Ali Alimov eki ev qurdı – birincisi Odessada, ekincisi – vatan Qırımda inşaat etildi, bu yerge onıñ qorantası 1987 senesi keldi.
- Ali Alimov Moskvada Büyük teatr yanındaki Horeografiya oquv yurtunda Galina Ulanova, İgor Moiseyev, Boris Messerer kibi belli pedagoglardan ders alğan edi.
- Ali Alimov pek yahşı aş pişire, onıñ şahsiy qurabyeler ve pitstsa retseptleri bar.
- Ali Alimov bala ve gençlerni oyunğa ögretmekten ğayrı, olarğa şahsen sana urbalarını ve bularnıñ ayrı qısımlarını (quşaq, öglük, marama, baş kiyimi, oyun ayaqqapları) tike.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
