Elâl qaşıqaşnı yapqan «Kuban bekonı» şirketinde mahsulat içine domuz yüregi kirgeni aqqında yazılğanı hata oldı, dep añlattılar.
«Böyle hata oldı, anda domuz yüregi yoq. Bu hatanı keç kördik», – dep añlattı şirket temsilcisi Crimeantatars.club portalınıñ mühbirlerine bergen izaatında.
Onıñ sözlerine binaen, şirkette hatalı yazını qapatacaq stikerlerni azırlaylar.
«Bu plönka bizde tura, büyük miqdarda. Bunıñ içün tek bir çaremiz bar – bunı stikerlernen qapatacaqmız», – dep bildirdiler şirkette.
Şirkette hata aqqında bilgenlerine baqmadan, onıñ resmiy saytında ne malümatnı red etüv, ne de añlatma yoq.
Qırım faalleri, öz nevbette, Qırım musulmanları diniy idaresine muracaat azırlay.
Avdetniñ evel bildirgenine köre, Qırım tükânlarında içinde domuz yüregi olğan qaşıqaş elâl mahsulat olaraq satıla. Qaşıqaş paketlemesini köstergen fotoresimni bloger ve qırımtatar faali Muhamed-Ali Sulaymanov Facebook saifesinde paylaştı. Yerli musulmanlarnıñ narazılıq bildirgenlerine baqmadan, bazı tükânlarda, em de camige yaqın yerleşken tükanlarda, içinde domuz eti olğan qaşıq aşnı satmağa devam ete.
