Mayıs 10-da Qırım Yuqarı mahkemesiniñ «Fevral 26» işi boyunca toplaşuvında politsiya hadimi sorğuğa çekildi.
Bu aqta adliyeci Edem Semedlâyev bildirdi.
«Bugün politsiya hadimi sorğuğa çekildi, evel o, Kiyev rayonı (Aqmescit, – Avdet) boyunca cinaiy militsiyası müdiriniñ muavini edi. Dedi ki, qırımtatarlarnı kördi, olar qaidelerni bozğan, provokatsiya yapqan edi. Amma aynı vaqıtta, delillerini ketirgende adaşa edi, ve neticede ayttı: onıñ körgenlerinden çoqusı – bu onıñ tahminleridir», – dep ayttı Semedlâyev «Qırım.Aqiqat»qa bergen izaatında.
Bunen beraber o qayd etti ki, adliyeci Aleksandr Solodkov dava malümatı, işlep bitirilmesi içün, prokuroğa qaytarılmaq kerek olğanı aqqında şefaat arizasını berdi. Mahkeme bu şefaat arizasını qanaatlendirmedi ve kelecek toplaşuv keçirilmesini mayıs 16-ğa belgiledi.
Avdetniñ evel bildirgenine köre, Aqmescit Merkez rayon mahkemesi «fevral 26 işi» boyunca yaqalanğan Ali Asanov ve Mustafa Degermenciniñ cezalavını deñiştirdi. Olar, ev yaqalavı şartınen azat etildi.
İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
