Frenkistan prezidenti vazifesine namzet ve «Milliy Cebe» firqasınıñ yetekçisi Marin Le Pen ilân etti ki, yarımadanıñ Rusiyege qoşulmasını qanunsız olğanını saymay ve 2014 senesi Qırımda keçirilgen referendum neticelerini lâğu etmekniñ kereksizdir.
Bu aqta o, BFMTV telekanalına bergen intervyusında bildirdi.
Kiyevde frenk siyasetçiniñ, böyle ilânlardan soñ, Ukraina territoriyasına kirişi yasaq etilecek, dep tüşüneler.
«Resmiy şahıslar böyle ilânlar yapsa, hızmetimiz ve Tışqı işler nazirligi buna uyğun şekilde baqa ve cevap bere. Bellesem, Le Pen içün kiriş yasaq etilecek ya da daa nasıldır tedbirler alıp barılacaqtır», — dep bildirdi Ukraina Havfsızlıq hızmeti reisiniñ apparatı yolbaşçısı Aleksandr Tkaçuk.
Onıñ sözlerine köre, bu meseleniñ muzakere etilmesinde Ukraina Tışqı işler nazirligi iştirak etecek, çünki bu ecnebiy vatandaş ile bağlı olacaq.
Rusiye Federatsiyası prezidenti Vladimir Putinniñ siyasetine açıq şekilde qol tutqan Marin Le Pen endi bir qaç kere aytqan edi ki, Frenkistan prezident saylavlarında ğalebe qazansa, resmiy olaraq Qırımnıñ Rusiye territoriyası olğanını tanıycaq.
Marin Le Pen — 1972 senesi «Milliy Cebe» firqasını teşkil etken ve 2011 senesine qadar onıñ yolbaşçısı olğan milletçi Jan-Mari Le Penniñ qızı ola. Hususan onıñ siyasiy fondu Marin Le Penniñ saylavaldı kampaniyasına para ayıracaq.
