Cemilev Ukraina Yuqarı Şurasına Qırım toponimiyasınıñ tiklenilmesi boyunca tehqiqat komissiyanı meydanğa ketirmekni teklif etti.

11.05.20160:19

Halq deputatı, qırımtatar Meclis reisi Mustafa Cemilev Qırım mesken yerlerine tarihiy adlarını qaytaruvı boyunca Ukraina Yuqarı Şurasında vaqtınca tehqiqat komissiyasını teşkil etmek ricasınen çıqışta bulundı.  Mustafa Cemilev munasip qararnıñ leyhasını devlet qurucılığı ve yerli öz -özüni idare etüvi, medeniyet ve maneviyat, insan haqları, milliy azlıqlar ve milletlerara munasebetler meseleleri boyunca parlamentniñ komitetleri tarafından baqılması içün teslim etti.

Qarar leyhasında ‘ 1941-1944 senesi qırımtatar halqı ve diger milletler vekilleri milliy alãmeti boyunca amelge keçirilgen sürgünlik sebebinden SSSR vaqıtlarından başlap yañıdan adlandırılğan mesken yerlerniñ adlarınıñ tiklenmesi aqqında söz yürsetile.

Hatırlatamız ki, bundan evel deputat Oleg Doniy ‘Qırım muhtar Cümhüriyetiniñ tarihiy toponimikasınıñ tiklenilmesi aqqında’ qanun leyhasını azırlağan edi. Ukraina Yuqarı Şurasınıñ devlet qurucılığı ve yerli öz özüni idare etüv meseleleri boyunca komiteti mezkür qanun leyhasını soñunace işlenilmesi içün yollamaq, zarur maliye masraflarını saymaq ve ‘munasip mesken yerler sakinleriniñ noqta-i nazarını közge almaqnı’ tevsiye etti.

Malümat: 1944-45 seneleri qırımtatar ve diger halqlarnıñ sürgünligi munasebeti ile Qırımnıñ 90 % faizdan ziyade mesken yer ve rayonlarınıñ adları deñiştirilgen edi. Qırım tarihiy adlarınıñ büyük qısmı qırımtatar adları edi. Olarnıñ arasında yunan, alman ve diger adlar mevcut edi, amma olar soñ episi rus adlarınen deñiştirildi.

QHA