İslâm-Terek rayonında yüz bergen qaza neticesinde eki bala zararlandı, bir insan elâk oldı

19.01.201713:25

İslâm-Terek rayonında qaza yüz berdi.

Qırım boyunca Yol areketi havfsızlığı devlet inspektsiyasınıñ malümatına binaen, Citroen avtomobiliniñ aydayıcısı kergin ava vaziyetini köz ögüne almayıp, qarşı taraf yolğa çıqtı ve Seat Toledo maşnasına uruldı.

«Citroen avtomobiliniñ 37 yaşındaki aydayıcısı, Aqmescit-Kefe yolunda ketkende, tuman ve buzlavuq şaraitinde qarşı taraf yolğa çıqtı, o yerde Seat Toledo avtomobilinen çatıştı, onıñ dömeni başında 65 yaşındaki aydayıcı edi. Qaza neticesinde Seat aydayıcısı elâk oldı», – dep añlattılar Devlet avtoinspektsiyasında.

Qazada Citroen aydayıcısı ve üç yolcusı da zararlandı, olarnıñ arasında eki bala oldı. Maşna aydayıcısı qafes yarasını, 38 yaşındaki yolcu ise, qafes ve belkemik yaralarını aldı. 9 ve 13 yaşındaki balalarnıñ qafa-miy yaraları, miy sarsuvı ve diger yaralar belgilendi.

Qırım Cumhuriyeti boyunca Yol areketi havfsızlığı devlet inspektsiyasınıñ malümatına binaen, yarımadanıñ aynı bu rayonında keçken kün daa bir büyük qaza yüz berdi. İçki Eski Qırım yolunda VAZ-211540 avtomobiliniñ aydayıcısı tuman olğan vaqıtta qarşı taraf yolğa çıqtı ve VAZ-21104 maşnasınen çatıştı. Qazada dört adam zararlandı.

Фото аватара

Автор: Редакция Avdet

Редакция AVDET